جزء ****138***من واش طيبتي اليوم ---عيد سعيد وكل عام وانتم بخير ----

[oum islem]

صباح الخير لكل الحاضرات

ام انس خسارة الغرايف خلاص بصح نديرلك ما ساهل غير هو كما تقول امي تاع الخايبات

المازة كان ابي واخي عندكم قعدو يومين هبلو ربي يعينك ويشفي وليداتك
زينوبة بصحتك الكوبا والخواتم يهبلو لعقوبة ليا خخخخ تتهناي بيهم
ام ماجد تحبي نعاونك؟ قولي برك نجيك نجري
وروزا ربي يهنيها مكتوبها هدا هو وقتو ربي يقدرها ويقدرك بيناتنا تفكرني بروحي ما تكثروش عليها الضغوط وديري وما ديريش
خلوها على راحتها دير كما تحب
ام وابنة التمسي لجيرانك العذر حتى انا في يوم ما عندي ما كسرت روس جيراني ربي يسامحني كان قريب رمضان والماصو بطيء
المغتربات لي توحشو لبلاد راهي السخانة تقتل ربي يعينكم على الغربة
الحوامل ربي يسهللكم ويسلكم على خير

مازال ما درتش لغدا واحتمال كبير سباقيتي ولا مقرون باه ما نديرش الكسرة
وللفطور ندير روز ان شاء الله
صح غداكم والصائمات تقبل الله
سلام للجميع

[x ام رحاب x]

سلام يالحباب
فطوري طعام بالكابويا
دائمة الحمد واش راكي انا راني بخير راكي عارفة بنتي جابت الباك هاد العام راني فرحانة وفرحت كي بناتكم كامل جابو الباك والحمد لله

[طالبة الجامعة]

السلام عليكم و اسعد الله اوقاتكم بكل خير اتمنى ان تكن بصحة وعافية

[chez biba]

السلام عليكم ورحمة الله وبركاته
نهاركم مبروك حباباتي واش أحوالكم
وردة الشمس مبروك الكوزينة ربي يجعلها عامرة بكل الخيرات
باروكي ولو متأخر





من ايام كتبت رد مبصح ما فاتش الله غالب ، حبيت نشكر حبيبتي ام نسرين على كوزينتها وحسن الضيافة وهذا ان دل على كرمك وطيبة قلبك ربي يعطيك على قد نيتك ويرزقك من أوسع ابوابو
بصحتكم الحفلات وربي يعينكم كامل دائمة الحمد، ام ياسو، ام ماجد والكل
ام محمد تاج عظم الله آجركم ربي يرحم جدك ويجعل مثواه الجنة
زينوبة بصحتك النيو لوك والخواتم تلبسيهم بالصحة ولهنا عجبني تاع الفراشات تعرفيني نموت عليهم هههههه وربي يرحم السائق والله قصة مؤثرة لحمي تشوك ربي يجيب الخير ويهدي عبادو
ام انس، عطورة منورين ربي يكون في عونكم وكل الحوامل
ام كوثر نقولك حاجة تضحكي عليا... كي قريت مشاركتك قلت واش بيها ام كوثر بالاك صايمة وداخت مبعد باش فهمت راكي تمعني هههههه شفتي واش ذكيه!!!!

[nihale89]

سلااااااام حبيباتي
راني ولدت عندي 4 ايام والحمد لله
ياسمين راهي تسلم عليكم
نشكر كل وحدة دعاتلي ربي يخليكم لبا يا اغلی صحبة
كي نرتاح شوي نحطلكم ااباروك

[وردة الشمس]

صح غداكم جميعا
دخلت على حلويات زنوبة وشي بيبا امممممممممممممممم سخفتوني
ونوبة بصحتك الخواتم ولعقوبة لحاجة خلاف

[دائمة الشكر]

مبروك عليك اختي نهال تربيها بالصحة والهناء ربي يشافيك وتحطينا الطمينة

[مسلمة بالفطرة]

اخت شي بيبا حلوياتك تحفة اذا تقدري تعطيني وصفة القاطو الاول اللي في الصورة الثانية بعد الصورة الجماعية. مباشرة عجبني بزاف

[chez biba]

مساء الخير وصحة غداكم
جبتلكم غدانا، انا راني صايمة
بسم الله


اختي نهال الف مبروك عليك ياسمين تتربى في عزمكم والحمد لله على سلامتك
مسلمة بالفطرة الله يسلمك اختي هاذيك غريبية وصفة جديدة راح نحطها موضوع بإذن الله

[أم ياسين الزهراء]

نهال تامني بربي البارح في الليل تفكرت الف مبروك الف مبروك حنونة

شي بيا انت ادكانا هههههههههههههههههههه ربي يبارك فيك فهمتي ام كوثر وهي طايرة ههههههههههههه

[أم محمد تاج]

مساء النووور غالياتي
شكر الله سعيكم والبركة في روسكم بارك الله فيكم
ام نهال حنونتي والله فرحتلك يالغالية والف الف مبروووك ياسمين تتربى في عزكم ويجعلها ربي ياسمينة مفتحة دائما يارب

[دائمة الشكر]

ام تاجو. ربي يرحم جدك ويعطيك الصبر والسلوان ان لله وان اليه راجعون

[ام و ابنة]

السلام عليكم
اختي شي بيبا حلوياتك تحفة ما شاء الله تبارك الله تعيشي كي تحطي موضوع هذيك الغربية ارواحي حطي لنا الرابط في الكوزينة انا ندخل مباشرة للكوزينة و نخرج و نخاف يفوت عليا موضوعك

البنات بش ماتحاوزناش ام كوثر نهدر شويا عالطياب و منبعد ندردش خخخخ
عندي استفسارين اللي تجاوبني ندعيلها دعوة الخير

الاول عندي باكيات تع اميلا ليمون هذاك اللي يخلطوه بالماء في مكان العصير و الشاربات حبيت نعمل بيهم كاش تحلية او تشيز كيك او اي فكرة خير ما نرميهم

الثاني قعدلي كمية كبيرة كاوكاو محمص عالخفيف كيفاش نقدر نخبيه للعيد الكبير ما تضحكوش عليا و الله راني نتعلم الاقتصاد و التوفير بعد ما كنت اكبر مبذرة المهم حاولوا ما تقولوليش جمديه ما نحبش نكونجلي غير للضرورة نحب الاشياءالطازجة

نهال الف مبروك ما جبتي و يتربى في عزكم و يسهل لكم تربيتو ربي يشفيك يا اختي

ام محمد و شراكي اليوم يالعزيزة ربي معاكم

ام انس و المازة يعطيكم الصحة الصباح كي دخلت كنت معصبة كي كتبت على جاري
المازة ربي يقدرك و يعينك و الله التربية صارت صعيبة مع هاذ الجيل و اللي ما عندهاش اللي يعاونها يا حليلها انا لوكان نحب نروح يوميا عند اهلي ماشي مشكل و لكن للاسف ما عندهمش الخاطر مع انهم يموتو على اولادي بصح يتقلقوا بزاف و نحس روحي ثقيييييلة

غاليتي ام اسلام و الله يا اختي نعذرو لانو حقو يبني و احنا ثاني بنينا دارنا و اكيد ازعجنا بالاك كاش واحد بصح لو كان الموضوع اسبوع فقط او اثنين عادي لكن يوميا ملي بدا الصيف تعيشي قوليلي كيفاش تجوزي نهارات الصيف الطوال من الستة تع الصباح بزوج ذراري صغار وحدك دايما يتحاربو؟؟؟؟؟؟ و منين اصلا تجيبي الطاقة و الخاطر كي تنوضي مقلقة ماشي في غرضك؟؟؟

انا قتلو لراجلي كلمو بالضحك و الملاحة قولو يحاولو ما يعملوش بزاف الحس قبل الثمانية هوما العكس يبداو الحس و لخبيط و التكسار بكري و منبعد كي ننوضو و يطلع النهار يولو يخدمو بهدوء
لوكان مثلا نهار يكولي الدالة او اي شيء استثنائي معليش بصح كل يوم حرام عليه هو مرتو و اولادو كرالهم بعيد و احنا و الله غير تعبنا
يالله ربي يغفرلنا و يهدينا و يصبرنا

زينب و ام انس بصحتكم الذهب انا مرت علينا فترة كنت مزيرة بعت ذهبي و مازال ما عاودت شريت والو

ام ياسين ودايمة الحمد و دايمة الشكر وام رحاب و وردة الشمس و طالبة الجامعة وكل المتواجدات اهلًا اخواتي و شراكم ان شاء راكم بخير و مهنيين

[دائمة الحمد]

مساء الخيرات وصحة غداكم
نهال الف مبروك وتتربى في عزك عندي وحدة من اعز صديقاتي وزميلاتي الزين والعين والقفازة والشطارة اسمها ياسمين ان شاء الله بنيتك تكون كيفها ربي يحفظها
شيبيبا اطباقك كالعادة يهبلو
اضم صوتي لجماعة الغريبية في انتظار الوصفة
غدانا عملت كاسكروتات طن وفرماج وهريسة بطلب من سي السيد تواضع كبير منو عنا سخانة تذبح قالي ما تشعليناش بالطياب ربي يدوم الساعة هههههه
ام كوثر صحة عيدك وتعيدي وتزيدي رانا كثرنا الهدرة اكثر من الطياب تبرد شوي الحالة وراح نرجعو للشخاشخ والكسور وتعمر الكوزينة بحول الله كيما كانت
لبنات لي مديقوتيين ملي خرج رمضان راني كيفكم بالصح لازم نستشعروا فرحة الافطار احياء للسنة الكريمة
راهو الفراغ الوقت في رمضان كان مفعم بالعبادات والطيابات والجري والكوزينة لا وقت للملل يا ربي يتقبل منا يا رب
ام ابراهيم كانش ما ظهر عليها استفقدتها كثيرا
ام كوثر خص نص ليك ولعاشقات الملوخية
ملوخية حلوة عسل طيبتها اول امس

[ام و ابنة]

البنات رايحة نحاول لأول مرة نعمل خبز البانيني في الدار اختي راهي عندي قالت لي تشهيت بانيني
قلت لها نحاول نعملو و نصورو للبنات و يا ربي ما نتبهدلش معاهم خخخخخخ
كنت حابة نعمل محاجب في الفرن عمري ما جربتهم ممكن غدوة ان شاء الله عندي اختي تموت على العجاين و النواشف ما تحبش المراقي و لي صوص
بصراحة المحاجب ديالي ملاح بصح الشكل عمرهم ما يجوني مربعين متحوفين كي دياولكم الله يبارك عليكم قلت نجربهم في الفرن بالاك يجو شابين و في نفس الوقت ما نقعدش نطيب بالحبة الله غالب قلوقة و عجولة على هاذي انا و العجين ماشي صحاب أنتيم شوية برك خخخخ
قولولي ياخي ندهنهم غير بالزيت لا بيض و لا والو و ما تنسايوش تجاوبوني على اميلا تع القارص و الكاوكاو
شفتوا ؟؟؟ ما نطلبش بزاف خخخخخ
اختي الأماني المجد اعذريني مقبيل سقط اسمك سهوا من قايمة البنات المتواجدات اللي حييتهم قولي لنا وش راكي تطيبي هاذ ليامات في هاذ السخانة

دايمة الحمد ديري معانا لا شان في انتظار موضوع الغريبية و ما تطبعيش بزاف خخخ