الخدمة الوطنية ماذا يحدث في الثكنات ؟

[عبد الرزاق 96]

06 اشهر اتفوتها جندي او اقل من الجندي تتعلم فيه الانضباط + الصرامة + ايجاد الحل المناسب والسريع عند حلول المشاكل +تتعلم الرماية بكل انواع الاسلحة كلاش+ سيمينوف+اف م ... +النهوض الباكر على الساعة الرابعة صباحا +التنظيف اليومي بالمجموعات للمراقد والمراحض اكرمكم الله وساحة الثكنة والحرلسة في الليل والنهار وفي جميع الاوقات + الرياضة والباركور اضف الى ذلك عدم الخروج من الثكنة لمدة 02 اشهر

[j-med]

ما هو الباركور ؟ ..... و ما هو التنظيم النظام نسيت اسمه ؟

[عبد الرزاق 96]

المشاركة الأصلية كتبت بواسطة j-med

ما هو الباركور ؟ ..... و ما هو التنظيم النظام نسيت اسمه ؟

الباركور عبارة عن حواجز يتم اجتيازها او خنادق تتعلم كيفية الدخول والخروج منها وتسلق الحبل و الانبطاح على الارض ومن فوقق سلك شائك يجب ان لا يلمسك لمسافة 20 متر و سلم عالي ب 03 امتار تتسلقه ثم تقفز منه

بعبارة اخرى تتعلم اتسوفري وانسى السيفيل والنهوض في اي وقت تشاء وتفعل ما تشاء في العسكر كلشي اوامر واتلامور منظمة لو طبق هذا النظام في الحياة المدنية لتحسنت الامور


اما النظام المنظم هو التعلم كيفية التحية او قواعد التحية وجميع الحركات الاخرى كيمين دور خلف دور استعد استاريح

عاديا سير وهو ما تطبقه لمدة 06 اشهر

[a007113h]

شكراااااااااا لك يا اخي

[bako01]

يا خاوتي انا كملت القرايا وعندي شهادة ماستر 2 في الهندسة الكهربائية سويت الوضعية وقالولي تجيك الاوردابيل في مارس راني حاب نسقسيكم واش هي الرتبة نتاعي و وين رايكم الكازيرنا الي نعقب فيها الستاج يا خاوتي وشكراااا

[bako01]

جاوبوني يا خاوتي وييييييييييييييييييييييييييييينكم يا لحباب

[kasoft2008]

المشاركة الأصلية كتبت بواسطة bako01

يا خاوتي انا كملت القرايا وعندي شهادة ماستر 2 في الهندسة الكهربائية سويت الوضعية وقالولي تجيك الاوردابيل في مارس راني حاب نسقسيكم واش هي الرتبة نتاعي و وين رايكم الكازيرنا الي نعقب فيها الستاج يا خاوتي وشكراااا

أدجيدون شاااف

[mohamed820]

انا فوتها في عين الترك بوهران برتبة جندي غادي تشوف لمشتهاش في حياتك غادي تعرف كلش
خدمت كورفي و قريطة و مانبعد داروني في مجموعة نتاع كولاس مع جماعة زينة وناس ملاح كلشي فايت يا أخي الكريم

اول شيئ اخبرك عليه حتارم نفسك يحتارموك

[lalib40]

احسن مدرسة هي المدرسة العليا للبحرية بتامنفوست الجزائر

[adnan benkirat]

السلام عليكم و رحمة الله تعالى و بركاته
حسب آراء البعض اخي الافضل حاليا لضباط هي= المدرسة العليا للإشارة بالقليعة
و لكن كل المدارس سوف تلاقي فيها - سوفرونس - في ايامك الاولى... و لكن سوف تعتاد بعد ذلك و ستعرف سيرورة العمل و ستصبح من اهل الدار
بالتوفيق لك

[j-med]

ماكانش لي راح للمدرسة الوطنية للصحة العسكرية في بلعباس ؟

[hero24]

j-med منين انتا ؟؟؟ بالاك نتلاقاو في سيدي بلعباس ؟؟

[mohamed ett]

السلام عليكم

نحكيلك عليها بالمراحل اخي العزيز
المرحلة الولى...مرحلة التكوين (المدة 6 اشهر)

- عند الالتحاق بالمدرسة يخليوكم بالسيفيل و فيها تكون مرحلة الانتقاء و الفحص الطبي(ملاحظة هنايا الطبيب يعرف يفوت برك الا الحالات الباينة زائد اصحاب العرف) ممبعد يلبسوكم الكومبا و تدخلو في مرحلة تدريب شاق تتعلمو فيه مختلف الحركات العسكرية(الاستعداد -الاستراحة-التحية-المراوحة-السير العادي...زائد تتخللها بعض العقوبات.....هههه كيباداشي و وضعية البطة و الزحف و ....صدقني مالقري هد المرحلة صعيبة بزاف الا انها فيها دكريات جد رائعة ما تتنساش) و تدوم هده المرحلة مدة شهرين تقريبا 45 يوم بالطبع ما تخرجوش فيها من الثكنة ممبعد يعطيولكم اجازة لمدة 10 ايام
-المرحلة الثانية تبداو فالدراسة في الاقسام على مختلف العلوم العسكرية(الاسلحة -القتال-تعليم الرمي-و مواد التخصص حسب المدرسة اللي راك فيها)و تتخللها حصص رمي بالاسلحة سيمينوف-كلاشينكوف-اف ام-البيا........ممبعد تديرو حفل التخرج و تولي ضابط في الجيش
ملاحظة بالطبع كي تكو ن عاد طالب في هد المرحلة تخدم كلشي الكورفي و القاريتا و جميع الخدمات منها نزع الحشيش بيدك و تنظيف محيط المدرسة و....مانحكيلكش خير ههههههههه)wc
مالقري هد المرحلة صعيبة و فيها ضغط بزاف الا انها حلوة و فيهادكريات روعة صدقني

المرحلة التانية مرحلة الخدمة (المدة عام واحد)
وممبع فيها الميتاسيون هنا يوزعوكم على الوحدات و هنا انت و زهرك الا رسلوك للبلاسة شابة راك تفوتها بقدرك و الا بعتوك للمناطق الصحراوية النائية (تندوف-اليزي-ادرار-تمنراست.و لا بلايس تاع مكافحة الارهاب فالجبال راك تسوفري حبيبي.....و في الاخير هي مرحلة وتفوت مالغري السوفرونس تاعها تتعلم فيها امور و تتعرف فيها على ناس وتكتشف عقليات لمختلف مناطق بلادك و تتعرف على بعض الولايات اللي بعيدة عليك و صراحة تعاونك باش تكون شخصيتك المستقبلية لتحمل المسؤولية...
و في الاخير نصيحة ليك خويا العزيز الا عندك شي حل باش تديها يعني كفالة و لا سبب طبي ولا اي حل سواء كان بالطرق الشرعية اوالا شرعية غير اكتيفي على روحك و ادا ضاقت بيك الحلول اكتيفي و اتكل على الله و فوتها و قلعها من طريقك مادامك صغير

ملاحظة انا راني نفوت فيها و الحمد لله بقالي شهر و نص باش نكملها بادن الله ادعيلي ربي نكملها بخير و العافية و ربي يسهل علينا كي نخرجوا


تقبل تحياتي و رايي المتواضع

[j-med]

اخي انا طبيب هل بعد التكوين ساعمل طبيب ؟ او ممكن شيء اخر ؟

و في عمري قريب 30 سنة هل سيطبق هذا العام ؟

[mohamed ett]

خويا نورمالمو الطبيب يستحقوك بالطبع يخدموك في مجالك ان شاء الله و تفوتها بقدرك لكن لا تدري فالمتقلبات عندهم كثيرة و غريبة
ما بخصوص السن فالله اعلم اسال هل قانون فوق 30 مازال جاري المفعول او لا