اسمع حكاية بلهجتي ....

[فتـ حييةـاة]

ومن بعد قالت زوجة الاب للزوج يليق ترمي بنتك وولدك فالغابة وتجي راح باهم قاللهم ارواحوا نروحو للغابة نحطبوا كي وصلوا للغابة قاللهم قارعولي هنا ضرك نجي قعدو يقارعو يقارعو يقارعو حتلا طاح الليل رقدو مساكين وطلع الصباح ناضو قعدوا يمشوا يمشوا يمشو يمشو حتى والولد عطش بغا يشرب من وحد العين ماخلاتاهش اخته قالتله هاذ العين اللي يشرب منها يولي وحش ماشربش ومن بعد قعدو يمشو يشمو يمشو لقاو ثاني عين تاع ما بغا يشرب ماخلاتهش اخته قالتله لوكان تشرب من ها العين تولي حيوان هو مسكين عطش وماطاقش يصبر ايا شرب تحول لغزال وراح مع الغزلان واخته مسكينة توحشاته كل يوم تقارعله عند العين باش تشوفه كي يجي يشرب مع الغزلان كل يوم تقعد تبكي وتقارعله (تستناه=تنتظره)عند العين باش تشوفه حتى لوحد النهار جات الخادم تاع السلطان تزقي الماء شافته غير تبكي راحت خبرت السلطان قالتله راهي كاينة وحد البنت شابة بزااااااف كل يوم نلقاها تبكي عند العين جا السلطان عندها وقاللها علا شراكي تبكي خبراته بلي راهي تبكي على خوها لي تحول لغزال قالله لوكان نسلكه ونرجعه بشر كيما كان تتزوجيني قالتله موافقة قال للخدم طيبولي قصعة طعام وقصعة تشيشة وحطوهم حذا العين فالغد جاء قطيع الغزلان وبداو ياكلوا فالتشيشة غير الغزال خوها راح كلا الطعام كي كملو الماكلة راحو وبقا هو لخاطرش كلا الطعام بزااااااااف وثقل وتزوج السلطان بيها وعاشت مع اخوها في قصر السلطان و تهلا في السلطان وبغاها وحد النهار جا واحد الحضري (بائع متجول يدير المقايضة سلعة مقابل سلعة ) خرجت عنه زوجة السلطان وعطاته طبق معمر لويز قالتله بدلهلي ب كاش حاجة قاللها اعطيتيني بزاف قاللتله معلي شانا زوجة السلطان وعندي قاللها كي يسموك قالتله يسموني لانجة هذاك الحضري راح يمشي يمشي يمشي حتى راح وحد البلاد ج جات عنده وحدة(ابنة زوجة الاب الشريرة يعني اخت زوجة السلطان من الاب فقط ) عطاته شوية صوف باش يبدللها وقالتله كثرلي صوالح قاللها الحضري:لانجة عطاتني طبق تاع لويز وماتشرطتش وانت على شوية صوف قعدتي تتقلشي بيها طبعا هي كي سمعت الاسم عرفتها قاتله اديني عندها داها عندها وقالتلها سمعت يا لانجة بلي زوجك السلطان عنده دار غير تاع حيوانات مايدخلها حتى واحد قالتلها واه كاينة منها قالتلها اديني نشوف كي وصلو للغرفة قالتلها حلي الباب باش نشوف كي حلت لانجة الباب دمرتها طاحت في ذيك الغرفة المعمرة بالحيوانات (انتحلت شخصية لانجة) وراحت لبست لباسها ودارت الحلي تاعها كي جا السلطان لقاها كحلة قاللها مالكي يالانجة وليتي كحلة قالتله منشمس بلادكم قاللها السلطان وماله شعرك ولا حرش قالتله من زيت بلادكم ايا عاشت مع الملكة ولانجة كانت عند الحيوانات وماكلاوهاش لانها كانت متهلية فيهم ومسكينة تضل تبكي تبكي والحيوانات يبكو معاها وكانت حامل من السلطان وكي بغات تولد ولدوها الحيوانات وجابت ولد و في يوم من الايام طلبت اخت لانجة من السلطان ان يذبح الاخ قالتله مايعييشش معايا في دار وحدة ايا هو يبغيها ومايقدرش يرفضبلها طلب امر الخدم باش يحمو القازلات(قدر كبير يسموه قازال جمعهم قازلات) ويذبحوه ويطيبوه قعد هو يصرخ بصوت عالي ويقول : يالانجة بنت اما وبا القازالات راهم يحمو(يسخنو فوق النار ) والخدامة راهم تسنوا يا سمعاته لانجة قالتله خاتم السلطان في يدي وولد السلطان في حجري سمعها السلطان قال له عاود قول كي قال الكلام مرة ثانية قالن لانجة خاتم السلطان في يدي وولد السلطان في حجري اسمعها السلطان وراح تبع الصوت حتى وصل للدار تاع الحيوانات وحل الباب لقاها قاعدة مع ولدها خرجها و سلك خوها طلبت لانجة من السلطان ان يذبحها والقازالات اللي كانو يحمو باش يطيبو بيهم خوها طيبو بيهم اختها الشريرة غير الراس خلاته ما طيباتهش لمداته مليح وقالتلهم ادو اللحم لزوجة ابي قولو لها اختي مازالت عندي ضيفة كولي هاذا اللحم ومن بعد حلي القماش تلقي امانة كلات زوجة الاب لحم كي شبعت وفتحت هاذاك القماش لقات راس بنتها راح عقلها وهبلت ولانجة عاشت حياة سعيدة مع السلطان واخوها و وولدها وزادت جابت اولاد وبنات


نتمنى تكون عجبتكم