زعما عمار خويا
وزينب مرت خويا
عمار عطالي التلفون:
ألووووووووو زينب راكي لباس؟
زينب: راني لباس والحمد لله سيرتو كي عدت راح نعيش معاكم
مزالي نهار برك ونعود عندكم
أنا: ماتفرحي ما والو ... نهار ولا نهارين ويولي يدير فيك التير كما راه دايرو فينا حنا
لاخرجة لا دخلة ... لا لبسة
وفوق هذا متسلط علينا
زينب: معليهش ... خليه عليا أنا
أنا: والله ق نستعرفك بيك إذا بدلتيلو العقلية
ياعتها نعرفك أمرأة وفحلة
المهم خلينا من هذا الموضوع .. كفاش راكم دايرين فيها ؟
زينب : اليوم ماما راحت تعرض في خالاتي باش يجو معايا غدوة
أنا: إييييييييييييييييه مليح ... يخي مش ياسر
هامتكثرولناش الغاشي ... مناش ضالين نوكلو ونشربو
زينب: راني جايبة معايا 20 وحدا برك متقلقيش
أنا: احنا رانا مهولينها في الدار
عمار راه من الصباح يشطح
وفي الليلة راه جاي القياط ومولا الزرنة يا محاينك...
زينب: وهي متحشمة ... بصحتو خليه يزهى ... اليوم نهارو
غدوا علاه قداش تجو تدوني ؟
أنا: بعد صلاة العصر
زينب: ملا معولين على عشا زين
أنا: كما تعرفي عوايدنا ... طبسي طعام وطرف لحم وقرعة قازوز
زينب : وفي السهرة؟
أنا: خادمين شويا قاطو ... وزيد الكوكاو مع التاي
واش زينب راكي من الصباح تهدري ق على الماكلة
عندك لا تاكليلي خويا عمار برك
قد ماهو داير فينا بصح راه عزيز ياسر
زينب: راني ق نسقسي فيك
فكرتيني غدوة يركب معايا عمار ولا كشما وحدا من لبنات
أنا: يا عيبي.. تحوسي يجي الشايب ويبهدلو نهار عرسو
يقلو تحليت وشديت يد مرتك قدامي ؟ لا حشمة لا حيا ...
حاجة باينة نركب معاك أنا
الله الله يا زينب متحشريش وحدا معانا
زينب: وهي مزعفة... معليهش هذا زهري
أنا: ماتقلقي روحك ما والو ... غدوا تجي للدار وتنساي
زينب: تهلاولي في الكورتاج برك
أنا: على عيني وراسي
عمار ديجا وصا صحابو
كاين 3 عندهم 404 و5 عندهم 403 و2 عندهم 504
والطاكسي اللي نجيبوك فيها
مانعرف لا سارفيس ولا 505
وحدا منهم
زينب: كشما عوادة كشما كاليش
أنا: ههههه بركي ما تحلمي ...
المهم يا زينب انت روحي وجدي روحك
وأنا راه عيطلي عمار نجيب معاه دور قايطة ونكمل خدمتي
أيا تهلاي في روحك
زينب: تبقاي على خير
أنا : سلام
( تقرير عن مشاركة سيئة )، و الموجودة أسفل كل مشاركة .
2011-07-26, 23:34
العرض الشجري