موضوع نقاشي حول الامازيغ

[rycerz]

كل واحد يعيش حياتو و يندفن في قبرو وحدو .. الناس لي فاقت ما بقات تتكلم في هذا الموضوع

أنا نعرف ناس كثير من القبائل خرجو من جيهتهم و هوما ساكنين في كامل الجزائر و متزوجين بنساء بعاد عليهم (عربيات شاويات صحراويات من الغرب من الشرق من الجنوب ... إلخ) نحّاو على رواحهم عقدة التعصّب و راهم عايشين لاباس عليهم .. بحتى أولادهم خرجو بصحة جيدة و جمال و ذكاء عجيبين.

--
رانا أولاد بلاد وحدة .. إذا ما استفدنا من التاريخ في أمور إجابية علاش رايحيين للأمور السلبية و الفتن و التفرقة فالوقت وين أوروبا تكافح من أجل الوحدة مع أنو الإختلافات لي بيناتهم فيها لعجب و تاريخهم مليان مآسي .. و اليوم حنا شايفين أنو سياسة عالمية لتحطيم الأمم الضعيفة و لي تعاني من مشاكل في الهوية و الطائفية و ما نعرف واش .. يعني إذا كملنا في الترهات هاذي رايحين عن قريب نكونو فريسة سهلة للمخططات التدميرية للأعدا و الصهيونية .. إلخ)

الحمد لله حنا عندنا أمر قوي جدا يجمعنا و هو الإسلام دين الأخوة و الرحمة و التراحم.
--
و هاذي الحياة و ماهيتها و قيمة الإنسان فصل فيهم ربّي سبحانو ...
قال سبحانه و تعالى : (يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا ۚ إِنَّ أَكْرَمَكُمْ عِندَ اللَّهِ أَتْقَاكُمْ ۚ إِنَّ اللَّهَ عَلِيمٌ خَبِيرٌ) الآية 13 من سورة الحجرات.