عجيب امركم ايتها النسوة

[الصادع بالحق]

نصيحة مني لكل بنت راهي تقرا في واش راني نكتب ولا اخت او زوجه او ام

اتقوا الله في اولادكم لمزوجين

خليوهم طرونكيل خليوهم يعيشوا حياتهم ايلا عندكم خوكم مزوج خليوه يعيش حياتو

متقعدوش تعسو فيه وش دار مع مرتو

وش شرالها

وين داها

متقعدوش تهبلولو في مرتو متقعدوش تهبلو فيهم

قسما بالله حرام عليكم

راكم تردوا حياة خوكم الى جهنم

خمموا بلي هدا خوكم

خمموا بلي كاش ميصرالكم متلقاو غير خاوتكم

خمموا فلخير لي دار فيكم خوكم

صدقوني نسا لي ياديو زوجات خاوتهم صدقوني ربي وكيلكم

كما تدين تدان

وش تربحوا واش من فايده

هاه وليت نوض صباح نخرج نشرب لقهوة فلقهاوي برا بعد مكانت مرتي طيبلي لقاطوا وتنوضني صباح طيبلي لقهوة

وليت نروح نخدم وعمل تاعي محاسب مسؤول فوترة لازملي تركيز كبير فلخدمة سمانة لي فاتت عيطلي لمدير خطرش وليت نغلط بزاف

قالي راك تغلط هاد ليامات ماشي عوايدك راني نلاحظ فيك مراكش كامل مركز فلخدمة غير لخير

وليت نروح نتعشا في برا بعد مكانت مرتي تعيطلي فتيليفون تقلي وش نديرلك تتعشى دك مرتي مكانشها راحت لدار ماليهم بسبة

خياتي

كنت هكدا فصيف نخرج مع مرتي نروحو نتمشاو شوية دك وليت نريح في برا وحدي حتى طناش تاع ليل لوحده باش ندخل لدار

كنت نرقد بكري مور منصلي لعيشة ونتعشى دك وليت ندخل لدار علوحده تاع ليل ندخل شمبرتي مكان لمرتي لوليدي نقعد نخمم حتى

زوج تاع صباح تلاته باش نرقد

وش من فايده ؟؟؟ وش تربحوا ؟؟؟؟ شفتوا

نصيحتي لي عندها خوها مزوج ولا وليدها مزوج خليو خوكم يعيش حياتو

هاني قدامكم نمودج كي خياتي خلطولي في حياتي شوفو وين كنت وكيفاش وليت

تحبو خوكم هكدا تصرالو كيما صراتلي

مالا ديروا في بالكم هايليك نهاية تاع خوكم ايلا تدخلتوا في حياتو زوجية هاو خوكم كيفاش تصرالو

مالا اتقين الله

خافوا ربي