ماهي تكلفة بناء منزل مكون من غرفة وكوزينا

[omar-fadel]

المشاركة الأصلية كتبت بواسطة عطر الملكة

السلام عليكم

اخي الكريم مواد البناء غالية و على هذا نحكيلك على تجربتنا عندنا سكن راه قيد الانجاز مساحتو الاجمالية 78 متر مربع لتحت فيه صالون و غرفة كبيرة نقدرو نديروها صالون نسائي و غرفة صغيرة بزاف ممكن تستغل في كوزينة صغيرة و طبعا مرحاض كنا معولين نكملولهم الفينيسيو لكن من بعد ظهر عندنا راي و قررنا نزيدو طابق لفوق باش نربحو الوسع و غرف اضافية كملنا البيليات و السوانتر كامل و من بعد قلنا ندالو مساحة قيس زوج غرف و هول و دوش صغير و الباقي خليناها حوش

نحكيلك على تكلفة هذو زوج غرف و الدوش بما انها تتناسب مع الطلب نتاعك

احنا اسقامتنا الدالا نتاعها 13 مليون ما بين حق سلعة و حق ايدين الماسو و الخدامة نتاعو قطيع الحيوط و الله قانسيت نسول زوجي و نقلك شحال اسقامو انت قلت راه عندك نص الاجر حاجة مليحة خففت شوية مصاريف نجو للمرحلة اللي رانا فيها حاليا رانا نصقلو فالحيوط اسقامنا الصقيل السلعة 2 مليون و حق ايدو قال 4 مليون يعني خمس ملايين مع حساب تقريبي لقطيع الحيوط بلاك تكون وحد 8 ملايين و توصيل الكهرباء ما بين سلعة و حق ايدو 1 مليون و ميتين الف

نجو للفينيسيون ما نعرف واش تخمم تدير انا نعطيك سومة نتاع كاليتي مليحة

مثلا مساحة كيما الي قلت عليها تسقام ما يقارب 6 ملايين كرلاج كاين كرلاج من 75 الف حتى 80 الف للمتر و كاين ارخس حسب النوعية
الفايونص نتاع الكوزينة يبدى من 145 الف و اطلع كاين نوع مليح انا سومتو وقت ما كنت نخمم في كوزينتي لقيتو ب 190 الف نظن نتاع اسبانيا و كاين نتاع تونس و كاين نتاع الترك و كل واحد و سومتو الموتيفات كل وحدة و سومتها انا سومت نوعية لقيتها 75 الف للحبة غالي شوية مي نوع مليح

لافابو نتاع الكوزينة كاين نتاع زوج باسينات نتاع ليترونجي رخامو ما يتقشرش و ضاوي ب 15000 دج مليون و خمسمائة

و انتاع الدزاير رخيس بصح شويا شويا و انت واش حاب تدير الفينيسيون مسألة ذوق و امكانيات

الابواب نتاع الخشب مساعدين مي الالمنيوم مليح للكوزينة و التواليت زوجي دار حساب لباب و طاقة كبيرة قالو نخدمهملك ب 2 مليون و حويجة

نتمنى نكون ساعدتك شوية

و صيام مقبول

الله يعطيك ما تتمني بارك الله فيك