على ماذا ندمتم !!

[samalg]

السلام عليكم ورحمة الله تعالى وبركاته

اهلا بابناء السنة الثانية ؟؟واش راكم جايبينها ولا راهي جايبتكم؟؟؟
شكرا على الموضوع وان شاء الله تستفادي من ردود الاحوة الاعضاء
انا نصيحة مني نقولها لكم كامل
قالو لي لي غادي يفوت الباك ويبغي ينجح يبدا يقرا فالصيف وهاذي انا ما امنتش بيها على الاطلاق لانو باه تقرا بلا استاذ يوجهك مستحيل على هكا ارتاحوا ملييييييييييح فالعطلة باه تدخلو ملاح وصحتكم بخير لانو يستنى فيكم مشوار طويل وتعب كبير احسن من انكم تكرهو القراية قبل ما تبدا ولا كيفاه؟؟؟
انا العطلة استغليتها في حاجة اني حملت المواضيع والملخصات والدروس كاملين وكل شي يخص شعبتنا ونظمتهم فالميكرو نتاعي الفروض وحدهم والحوليات وحدهم والبكالوريات وحدهم والدوس وحدهم والملخصات وحدهم وهكذا كي بدا العام كان كل شي واجد
جبت كراريس وسوجيات من عند لي قراو قبلي باش يعاونوني
برك درت غلطة اني ما بذلتش جهد كبير مالبدية نتاع العام كنت نقرا بصح مشي كيما ضروك ضروك راني نجري وندور على رودة
المهم قراو مليح ما تضيعوش وقت بلا والو يلا شفتو دراسة الجماعة تنفعكم ديرو جماعات وقراو انا شخصيا نبغي نقرا وحدي لانو الجماعة يخلطوني شوية
االحفظة ما تخلوهاش تتراكم عليكم وما تقولوش غيلا لحق الفرض ولا الاختبار باش نقرا لالا قراو في كل وفت وبالطبع ما تنساوش الاستراحات مشي قاع وقتكم قراية لانو التعب في ليكول وفالدار يرهق التلميذ بزاف
وما تنساوش الصلاة وذكر الله والاستغفار وتقوى الله
بالتوفيق للجميع وادعولنا ربي يوفقكم
التلميذة العيشوشي سعاد ثانوية الشهيد زروقي الشيخ بلدية تاوقريت ولاية الشلف في الخدمة
شكرا