سوسو يا عسل ربي يفرحك كيما فرحتيني بكلامك و ربي يعيننا جمييييعا
ام انس ربي يهون عليك و يكمل لك و يسهل لك
كنت سبق و قلت لكم انو يما عندها ورم و كي كانت تداوي جيت قعدت معاها فترة و جريت بيها و كي ارتاحت رجعت للغربة و لكن ضميري ما هنانيش عليها و وساوس الدنيا كانو ينوضو في راسي علما انو يما ربي يحفظها و يشفيها و يهنيها طبعها صعيب شويا فما بالك كي تمرض
و كذلك بعد عشر سنين زواج و كي كنت في الغربة طرحت ثلاث مرات متتالية و كي نروح للطبيب يقولو لي ما عندك والو و لنقليز معروفين بالبرود تع الاطباء تعهم و انا بديت نكبر ما عنديش عشرين سنة و هنا الاطباء يهتمو خير بالحمل لهيك ما يحبوش الذراري
و هذيك الفترة بصراحة ما كنتش نلبس الحجاب و كنت هابلة و حابة نديرو و بانتلي ماكانش كيما الحجاب وسط المسلمين رغم انو الحجاب نثم حاجة عادية عندهم و متعودين عليه و متقبلينو بسبب كثرة الباكستانيين نثم
كذلك كانت تبانلي بلادنا تقدمت شويا و نسمع الناس يشكرو فيها
فنظرا لكل هذه الاسباب خخخ قررت اني نحبط خاصة انو كانت عندنا شويا مشاكل في الاوراق فرميت كلش و رجعت علاجال يما و الضناية و الحجاب و حب الوطن
نكذب عليك لوكان نقولك ماندمتش قد شعر راسي خاصة انو من المستحيييل نحلو مشكل الاوراق ضرك و لكن بصراحة املي بالله كبير و علابالي اذا شاء امرا قال له كن فيكون و قادر في غمضة عين يفتحلي الابواب المغلقة
و الله تعبت من البيروقراطيةو الرشوة و السيركيلاسيون و الغش و السكوت عن الحق و انقطاع الكهرباء و النت و كثرة الاسمدة في الخضار و الفواكه و الهرمونات في اللحوم و الدجاج بلا ما يكون عندك اختيار او بدائل صحية و تهاون المستشفيات و التشناف و قلة الادب و انعدااااام النظافة و و و حتى اقرب الناس صارو يحوسو على مصالحهم قلييييييييل وين تلقاي صلة الرحم و علاقات القرابة لوجه الله و ناااااادرا تلقاي اللي يرفدك او يعاونك كي تحصلي
و الاهم اني تمنيت ولادي يعيشو في بلاد عالاقل نقدر نوفر لهم اكل صحي و مضمون و روضات و مدارس نضمن فيها الانسانية و الضمير المهني و نحوس بيهم يشوفو الطبيعة و النظافة و النظام و القانون
علابالي الغربة ماشي جنة و لكن البلاصة اللي كنت فيها كانت هايلة
بالنسبة للاولاد شفت حالات هنا تع عائلات محافظة في مجتمعنا المحافظ و اولادهم خرجو الطريق و شفت في الغربة عائلات اولادهم ماشاء الله ناظو عالدين و الاخلاق الحميدة يعني باختصار ربي هنا و لهيك حنا نبذلو جهدنا و ندعيو ربي يصلحلنا فيهم و من و لا من اكيد كي توصل للصح و يكبرو و يشوف الانسان خطورة على دينهم يرمي كلش و يجي
ضرك تجي ام حبوبة الحبوة تبهدلني و لا اما مسعودة تحاوزني الله غالب ما نعرفش نخبي والو
( تقرير عن مشاركة سيئة )، و الموجودة أسفل كل مشاركة .
2015-10-29, 21:06
العرض العادي
