دورة الفراشات الشاطرات في التنظيم و التنظيف خلال اجازة الصيف

[وفاء الياسمين]

المشاركة الأصلية كتبت بواسطة رقية الناجحة

حبيباتي امي مريضة وطلب منا ان ناخذها لطبيب القلب ادعوا لها بالشفاء العاجل يارب يحميها حبيبة قلبي

يا رب اشفها شفاءا لا يغادر سقما
اللهم عافها و اعفو عنها

[ام محمدْ ومريمْ]

صباح الود والخير والنور على احلى فرشات ا
نا معنديش ساعة ملي نضت واععععع مصليتش الفجرفي وقتو
راني صليت واستغفرت وقريت القران وضرك نروح نبدا اشغالي
سلام

[assinet]

صباح الفل على أحلى فراشات صباح الورد على حبيبتنا حبيبة
يوم امس نهضت على 7.30 غسلت وغيرت ملابسي درت مكياج تعطرت حطيت الغسيل في الغسالةو رحت للمطبخ كان منقي وجدت الفطور فطرت دوزنت الغداء و حطيتوا يطيب نهضوا زوجي وبنتي فطرتهم غيرت ملابس بنتي وجدتها وخليتها تلعب لميت الفراش غسلت الدوش الغرفة 2 و الصالون كانوا منظمين سيقت الدار نشرت الغسيل سيقت الحوش روحت درت طلت على الغداء كملتوا حوايجوا عندي بلاكار في haul فيها شوية فوضى نظمتها شوية ورحت فصلت قندورة لامي ربي يحفظها جاء زوجي تغدينا غسلت الماعن زدت فون نشاف على الكولوار و المطبخ رقدت بنتي رقدت شوية نظت خيط في القندورة شوية و بعد هزيت بنتي روحت قعدت مع عجوزتي حتى الليل روحت دوشت أنا بنوتي عتيتها حليبها و رقدت
أن شاء الله نكون حتيت تقرير مانسيت والوا نخليكم في رعاية الله يا الفحلات الشطورات صح غداكم

[وفاء الياسمين]

السلام عليكم كيف حالكم

[ذات النورين]

صباح النور
حبيت ننضم اليكم الا تقبلوني طبعا
راني في الفريق الازرق انا وبنتي وزوجي ماكثة بالبيت. ةراني غير كيما كريت في مدينة الاغواط
والغبار داير حالة كل يوم كيف كيف وراني نعاني من القرلو لانو كي جيت نسكن لقيتو قدامي ههههه وانا ما نحملش الحشرات في الييت رايحة نطرطق جربت الصاشي الاخضر ووالو
اليوم نضت على الثامنة شربت بنتي لحليب ورقدتها ورحت نقيت الكوزينة لانو انا زوجي عندو طبيعة ينوض غي الليل وياكل يعني اللي نقضيه قبل ما نرقد كي نوض نلقى الدنيا كلها مروسة وهكذا نخدم مرتين
ودركا راني نسغل في الحوايج قريب نكمل ولغدا راح ندير ماقارونة بلاصوص بقاتلي غير لاصوص راهي تطيب فوق النار
عاذو ليامات راني حاسة بخمووول وراني كارهة داري لي راني كاريتها دعولي ربي يحسن احوالي حبيباتي

[أم تغاريد]

السّلام عليكم ورحمة الله وبركاته
أختي حبيبة يعطيك الصّحة على الردّ راكي شجعتيني بزاف
ربي يفرحك ويكملك واش راه في بالك
---------------*----------------
من اليومين لي فاتو وانا مع المطبخ بالعقل لي يقول الكوزينة غولة صح غووووووولة
لول لبارح الشغل تاع كل يوم ومبعد انطلقت في بلاكار تاع لماعن وتاع المشتريات الغذائية في الكوزينة
قبل ما نبدا درت غسلة تاع الحوايج لبيوضا



ورحت لشغلي فرغت البلاكار من كل محتويات ونقيتو مليح وخليتو ينشف
في هاداك الوقت قعدت نغسل في البلارات ونرمي واش لازم يترمى للأسف رميت بزاااف جلجلان لقيت دار فيه الدود وولى يريح رغم انو ماعنديش بزاف ملي شريتو لذلك ننصح الاخوات دايما يتفقدو السميد الجلجلان الفرينة....

اخواتي تفادين " الساشيات" في البلاكاغات حاولي اديري كل شي في بلارات



شوفو مثلا الدوزان تاع الحلوى درتو في بلارات صغار ومبعد جمعتهم كامل في علبة كبيرة تاع بلاستيك



علاش الشغل تاع الكوزينة متعب لانو فيه تفاصييييييييييييل تعرفو أصدقاءنا لي مانستغناوش عليهم « le bras et le bateur"
لازملهم قعدة وتحكمي موسي وشيفونة وتنقي الفتحات لي تلقاي فيهم



كانو عندي بايطهم لقيتهم قدامو ورشاو رميتهم ودرتهم في علبة تاع بلاستيك ربحت مكان في البلاكاغ



لماعن ستفتهم فوق البوتاجي وحاولت نرجعهم بطريقة مختلفة باش كي نجي نجبد فنجان مانزدمش في كاس





الطباسا تاع الجواز وحدهم لي بول وحدهم ...الخ... تاع السارفيس وحدهم أيضا





-------------

اليبارح نضت صليت ووليت نرقد حتى ل 6 نضت حددت ملابس زوجي وطيبت القهوة
وشربت معاه وبقيت نايضة
وطبعا هذا إنجااااااز عندي لاني مانوضش بكري عادة وماخرجتش علي عندي بزاف نشاطات نحب نديرهم مايكفينيش الوقت

على السابعة 7 انطلقت في غسل الحوايج درت ماشينة ادور وجبدت سلة تاع حوايج لي لازم نغسلهم بيدي شدولي بزاف الوقت بصح تهنيت منهم

على 9 تقريبا كنت كملت نشرت كل الملابس

وليت خملت الدنيا نظفت الحمام كنست وسيقت الدار ماعدا المطبخ لاني كنت مولية ليه لاحقا ....
غسلت حاشاكم البلايغ تاع زوجي ( ماتنساوهمش مرة على مرة )

غسلت الفناجن تاع لقهوة الدار راهي مخملة كون يجي كاش ضيف مانتفرفش

الان نروح لتنظيف عمييييييق الى الثلاجة

طفيتها وخرجت قاع واش فيها وغسلت بماء وسائل الاواني وجافيل كاين لي يستعملو الخل انا مانحبش ريحتو

غسلت الارفف تاعها والقجر تاع الخضر وخليتهم ينشفو في الشمس


نشفتهما مليح وزدت درت الفونتيلاتوغ يدور قدامها باش تنشف تم تم (عصر السرعة)



بعدها رجعت كل الارفف وهناك خطرت لي فكرة التشباح قلت لازم ندير لمستي في ثلاجتي بواش عندي من وسائل




غلقت الفريجادار وشعلتها وخليتها مدة ساعتين او اكثر ماحطيت فيها والو رحت فطرت صليت ورقدت

بعدها نضت رجعت الدوزان حسيتها ولات ضاوية سيقت الكوزينة وخلاص شغلي لهذا اليوم

لعشية دخلت الحوايج لكن ماقدرتش نطويهم رحت درت لعشا ....

اخواتي مشكلتي اني مانخدمش بالقعاد دايما واقفة اكرمكم الله رجلي ولاو يوجعوني في الليل
لي كيما انا لازم نحاولو نولفو روحنا نخدمو شوية بالقعاد باش نلقاو صحتنا في الكبر ان شاء الله

---------------------------
اليوم خصصتو للفرن نقيتو ولى يولول الله يبارك
بصح .ماصورتش لاني درت كارثة كسرت اليد تاع الكوشة جيت نفتحها باش نغسل الزجاجة تاعها جبدتها في يدي
تقلقت بزااف لكن قدر الله وماا شاء فعل
راني خايفة راجلي يزعف كي يجي ماقلتلوش في التلفون

ربي يسعد قلوبكم الطيبة اخواتي

ديرو القلب في الشغل واحتسبوه لله باش يهون عليكم

اسمحولي اخواتي غير انظم وقتي مليح نتفاعل معكن ان شاء الله ونعلق على ردودكن

[ام محمدْ ومريمْ]

سلام لبنات واش احوالكم
ليوم فطرت على 8ومبعد شغلت سورة البقرة وتوكلت على الله وبديت شغل اول حاجة بديت بالحمام رلو الجافيل وخليتو ومبعد رحت للغرفة وفرشت السرير ومبعد رجعت عجنت وحطيت البصل يتقلى ورحت كملت كنست الصالون والغرفة والكوزينة ومسحت الغبرة وكملت الحمام30-10ومبعد عيت لماما وعجوزتي حتى ال11باه طيبت المحجوبة وال12كملت الغدا لميت الماعن غسلتهم ومسحت الكوزينير والفريجدار بقطعة قماش فيها جافيل ودوشت وتوضيت 30-12وسبحت وراء الصلاة ودعيت وقريت المعوذات ورحت رقدت على 2 نضت طيبت التاي شربت وقعدت نتفرج وندير في الرياضة وزدت حتى ناض زوجي وبني طيبت الحليب وتقهواو وضرك درت العشاء يطيب راح نعود نصور ان شاء الله

[ام محمدْ ومريمْ]

ام تغاريد يعطيك الصحة يالفراشة حابة نسقسيك كيفاه لسقتي البابيونات

[رقية الناجحة]

ام تغاريد الله يعطيك الصحة ربي يبارك لك ياالفحلة

[رقية الناجحة]

وداد ام محمد الله يبارك عليك وحواليك واصلي وادعيلي ربي يهنيني

[ام محمدْ ومريمْ]

ربي يهنيك ويسترك ويكملك لي راهو في بالك اللهم امين اختي رقية ليك والجميع الفراشات

[ام محمدْ ومريمْ]

سلام اخواتي راني صليت العشاء وسبحت وقرايت 2صفحات قران ودعيت وزدت قريت سورة الملك ورحت للكوزينة لميت لماعن وحطيتهم في بلاصتهم وسحت الكوينيار ورنخت الحمص لغدوة ان شاء الله وفرزت غرفة الجلوس ونضمت الفرشات ولميت العاب محمد وكنستهم وشبه دوشت محمد وحطيتو في بلاصتو وجدت ثاني سينية نتاع الفطور لغدوة ان شاء الله وضرك نقعد شوية ونروح نرقد
تصبحو على خير اخواتي

[omselma]

مساء الخير حبيباتي .توحشتكم راكم منورينها بشطارتكم كامل دون استثناء ومرحبا بالوافدات الجدد .حبيبة العزيزة على قلبي شكرا على سؤالك واهتمامك والله فاتت علي ظروف ولكن الحمد لله على كل شىء في الاول كان المشكل مع اخت زوجي قعدت شهر وواش شبت فيهم وتعلمت حوايج بزاف ومنها اني قررت نحيهم من بالي حتى يفرج ربي . وانا في عز هاذوك المشاكل لا ماكلة لا شراب غير الدموع برك زادو عيطولي تاع دارنا قالولي مات خو مرت خويا في حادث مرور بشع. المهم ماروحتش النهار الاول الغدوة كي عدنا ررايحين انا وراجلي نعزيو قاللي ديري حوايجك تقعدي يامات في داركم قتلو علاه قاللي خير من تقعدي هنا لا ماكلة لا شراب . المهم رحنا عزينا وداني لدارنا مع العلم تاع دارنا ما علابالهمش بالشي اللي كان صاري معايا كي نروح عندهم نضحك كاللي ما كاين والو . المهم الغدوة درنا العشاء تعشينا وانا قلبي مهبوج يعني خلعانة وحدي وحدي مارقدتش حتى للواحدة تاع الليل .شوية هكذا نسمعو في الباب يدقدق بالفور كانت الثلاثة لابوليس قالونا خوكم ارواحو ليه راهو في السبيطار في حالة واش نقولكم خلعنا خلعة الله لا يشوف فيها مومن .حكموه زوج ضربوه على راسو في وجهو المهم دقدقوه. بايت في الكومة والغدوة جابوه ما عرفناهش قعدت يامات حتى ارتاح خويا عيطلي راجلي قاللي اني توحشتك . نديك تروحي روحت لقيتو بدللي الشومبرة تاعي وجابلي واحد اخرى بيضة وكحلة. وشرالي ماشينة لافي وقاللي اصبري برك وقريب ندير داري وحدي ادعيولي . اما الايامات هاذو عندي الاعراس بصح كانت عندي واحد الروية بالسيف باه كملتها ما زالولي الزرابة نهار الخميس نكملهم وراني مع الفريز. ما تنساوش تدعيولي

[أم ريتاج زهرة]

الأخت nazjo بالتوفيق أختي قاع كنا كيفك و تقدمنا بفضل الله و الأخوات و المنتدى اللي لمنا أم تغاريد ربي يرزقك الذرية الصالحة و ربي يوفقك و يهنيك و الله الله على هاذيك الكسرة باينة عليك شاطرة Massilyawissel يا بنت بلادي بنت وهران الباهية غير تبعي الدورة و نأكدلك غادي تنجحي بالتوفيق أختي يتوحشك الهخير أختي mariamalak حتى حنا توحشناك واش حوالك و هاذ الغيبة كيفاش المهم حافظي على روحك كاش ما تحكيلنا على العطلة نتاعك أختي و حبيبة قلبي و رفيقة دربي حبوبتي الغالية واش حوالك و نشكرك على الرد اللي يرجعلي الروح و بالتوفيق أختي تقريري تلقايه لعشية إذا كتب ربي و الأخت أم نُسيبة العامرية واش حوالك و حوال النسوبة و الله غير توحشت الهدرة معاك و ربي يهنيك إختي تستاهلي كل خير رقية الناجحة بالشفاء على الوالدة و أنتي لاباس عليك ؟ و الباقيات أم صابرين و أم هزار و أم آدم و الرجاء الأماني و ّأسينات و ماسيليا واش حوالكم راكم جايبينها و لا والو و أم هند و ذات النورين بالتوفيق أخواتي حيت نسالكم على أم مؤمن و أم سلمى عسى المانع خير

[ذات النورين]

السلام عليكم يا لمة الخير
ام ريتاج شكرا حبيبتي لانك الوحيدة لي رحبة بيا وطلعتيلي المورال شوية لانو فعلا راهو هابط من الظار لي راني فيها تعبتني تاع الصح
ام تغاريد يعطيك الصحة يا الفحلة راكي جايبتها يا رب تجينا العدوة منك ونعودو شاطرين مثلك ههههعع
ام سلمى رغم اني جديدة ما نعرفكش نقولك ربي. يعينك على ما نتي فيه