تروسو البيبي مساعدة

[wassila21]

السلام عليكم أختي سهى
بالنسبة للملابس ألي تشريهم راهم البنات ساعدوك، أما بالنسبة لحقيبة المستشفى أنا راني وجدتها و ساعدتني فيها أخت زوجي لأنه عندها خبرة كبيرة ماشاء الله، أولا في كيس يكون شباب ديري زوج بونيات و تريكو دوبو و كاش كور و سروال و طرف تاع القماطة يكون مربع باش كي يزيد الصغير يفرشوها على صدرك و يحطوه فوقها و كوش وحدة برك الملابس لازم يكون لونهم أبيض باش يشوفو إذا الصغير عنده البوصفاير و زيدي معاهم 2 فوط صحية كبار و 2 ملابس داخلية، هذا الكيس أدخليه معاك للصالة ألي راح تولدي فيها، و في الحقيبة ديري إما جبة أو بيجاما مع فيزو قطن و 2 ملابس داخلية و شال خشين و تقاشر و سربيتة و صابون و مشطة و ريحة و الفوط الصحية كثري راكي تحتاجي و بنتوفة، و للمولود قرونويار وحدة برك ، سروال، تريكودوبو، قرونويار ألي تتقفل على لا كوش ، بوني ، قفازات ، لي كوش 4 حبات، صوالح القماطة ، لا سوسات، كوفيرطا صغيرة باش تلميه فيها و كوات معليش تكون قديمة باش تفرشيها في اللوندو تاع الصبيطار، هذه الحقيبة تخليها فوق السرير ديالك و تدي معاك ثاني كوفيرطا و درا و مخدة غير توصلي لغرفتك فرشي سريرك ، و ما تنسايش الدفتر العائلي و الكارني تاع الحمل و آخر إيكوقرافي درتيها ، تجنبي تاخذي معاك الذهب و البورطابل خليه عند زوجك، نهار تخرجي عجوزتك أجيبلك اللوندو ديالك و خرجي فيه المولود

هكذا موالفين يديرو في مستشفى عين الدفلى، ما نعرف إذا يتبعوا نفس النظام في كامل المستشفيات، إن شاء الله نكون أفدتك
ربي يسهلك حملك و يجيبلك ساعة ساهلة إنشاء الله