كيكة الدرع من غير بيض.

[أنا أمهم]

السلام عليكم و رحمة الله و بركاته

بسم الله


اللي ما تعرفش الدرع (البشنة) و الا تحب وصفات أخرى للدرع تشوف موضوعي :
https://www.djelfa.info/vb/showthread.php?t=930179

المقادير 1 : 1 ك ماء, 1 ك سكر , 1 ك حليب غبرة, 1 ك زيت ناقص شوية
المقادير 2 : 2 ك دقيق درع , 1 م ك خميرة قاطو
اختياري : تمر طري أو تمر مرحي , مكسرات و جلجلان للزينة.
الطريقة : تحطي المقادير الاولى في خلاط العصير حتى يتجانس الخليط.

ثم تصبيها فوق المقادير الثانية (الدرع تكوني غربلتيه مرة أو أكثر و خلطتيه مع الخميرة الكيميائية) و خلطيها بالخلاطة اليدوية حتى يصير المزيج متجانس لكن خاثر أكثر شوية من الخليط العادي للكيك.
حضري الطبق اللي باش تدخليه للفرن : ادهنيه بالزبدة و رشيه بدقيق الدرع.
صبي نصف الكمية و حطي فوقها التمر (حليه بصوابعك و حاولي يكون مثل الورقة الغليضة و غطي بهذه القطع النصف الاول من الكيكة)
صبي النصف الثاني من الكمية برفق و استوي السطح من فوق (بلي ايديك بماء عادي أو ماء زهر و استوي الكيكة)
اللي ما عندهاش تمر تقدر تستغنى عليه

زينيها من فوق بالمكسرات اللي عندك (تكون نية باش ما تحمارش بسرعة) و رشيها بالجلجلان.

في هذا الوقت تكوني سخنتي الفرن 180 درجة , دخلي الطبق للفرن حطي النار من تحت و اول ما تعلى الكيكة طفي من تحت و شعلي من فوق (هذه النصيحة نسبية لأن كل واحدة و الفرن متاعها)

سامحوني اني ما صورتش المراحل في أقرب فرصة نعاودها و نحطلكم الصور للتوضيح أكثر , حاليا عندي كان صورها و هي حاضرة :

و


من داخل مع ان الصورة ظالمتها شوية :

ان شاء الله تعجبكم. جربوها و ما تندموش راهي خفيفة و مفيدة.

ملاحظة : الوصفة هذه تعلمتها من النت خاطر نسيت وصفة أمي ربي يفضلهالي (كي نرجعلها نجيبلكم وصفتها الاصلية) و ان شاء الله المرة القادمة نجيب وصفة أخرى لكيكة الدرع بالبيض و الزبيب و المكسرات و التمر , انتظروني .