غير ليزالجيريا

[just.nour]

سلام عليكم


الجزائري بصماطو وصباطو
الحاجة لي نتميزو بها حنا ليزالجيريا هي التماتل في الطريقة العيش وتقول حكمو سبيكتور التاهر ودارولو فوتو كوبي
برك وحدا فونصي وحدا كلاغ جيبها من الادرار 01 حتى الغيليزان 48
هااا الصماطة وخشانة الراص هيا لامارك ديبوزي نتاعنا كيما كوكا كولا . وين مامشينا نبانو جزايريين
هادي قصة صرات لواحد من الفاميليا ليا. يسكن في ليترونجي اي ميغري كما نقولو حنا .عندو ولاد صغار....
مرة حب يجي لدزاير في الصيف وجاب معاه لا فامي قاع وراكم عارفين الصغار يحبو الالعاب نتاوعهم
جابلهم كابا نتاع ليجوي معاه .
هادا سبيدرمان يهدر ...هادا باتمان يضحك ..هادي بالو جابولاني ....الخ
وليداتو مرا راحو لبرا .اي الشارع يلعبو وداو معاهم ليجوي نتاعهم
10دقايق وحوست عليهم امهم لقاتهم يلعبو معا وليد عمهم الجزايري بفكرون اي سلحفات ..ههه
دبرليهم وليد عمتهم سلاحف النينجا نتاع بصح ههههه الجزايري يبقا جزايري
ونولو لصماطة الجزايري
الجزايري يلقا محل مغلق يسقسيك ونتا حدا هداك المحل
هاد المحل راهو مغلوق ....تقولو منعرف واقيلا راك تشوف فيه داير الرونفوا *#333 * ???
وميفتحش .......تقولو منيش معاه وين راه
الجزايري يروح يشري البيض يبقى يخير في الكبيرة حتى يفقص فيدو البيض
وووو عقلية معليش ندوق
يقولو البائع دوق خويا ممكنش مشكل وهوا يقول في خاطرو دوق يعطيك السل دوق ربي يجيبهالك
ونضن هادي مبقاتش دروك لكن تكون عاد كاينة في بلايس من الجزاير الواسعة
يمشي يشري ليموناد اي القازوز ههههه وينسا الكونسين اي القرعا
ويقول لمول المحل عبيها في ساشي معليش ولا في قرعة ديال ما معدني فارغة هههه
الجزايري يقولك نهار شباب ليوم الجو راه غي نتاع ..رقاد ...تحواس ...بحر
وميقولكش جامي ....نهار غي نتاع خدما ولا قرايا ...
وهادي بمناسبة العيد الاضحى المبارك
الجزايري وحدو يستغل الاضحية بنسبة 200 %
اللحم =...محمر و مشوي ....100%
العضم اي الكرعين= لوبيا في نهار نتاع برد ...100%
بوزولوف 100%
دوارة =.ملفوف شطيطحة ..عصبان .. و اغراض اخرى 150%
الصوف =مخايد ...لحوفات ..تريكوات..160%
الجلد= يمدو لجامع في سبيل الله حسنات 50% خير من ماكانش هههه
راكم عارفين خاطرش معندو مايدير بيه غير يبيعو وحرام كي ما تعرفو
يخصو غير بع بعععع ديال الكبش يديرها صونوري لتيليفون برك.
هادا حد الواجد نتلاقوا في مواضيع قادمة ان شاء الله .