من قصائد الشاعر عبد الغفار عبد الحفيظ...لكل بوسعادي وبوسعادية

[البوسعادية]

السلام عليكم..
حبيت ان اقدم لكم هذه القصيدة للشاعر الكبير عبد الحفيظ عبد الغفار واتمنى ان تنال اعجابكم..واهديها بدوري لكل ناس بوسعادة...

بوسعادة ذا شاعرك جا النجدة
وهمومك ياغالية شورك جابوه
احكي لي واش ضارك لاه الجحدة
ضرك في قصيد للامة نحكوه
نعتبرك في الذات طرف من الكبدة
اومن يسمح في كبدتو لازم يكووه
احكي لي خلي بشعري نتحدا
ولي يوقف في طريقي ينعل بوه
سكتت دهر طويل ختمت بالنهدة
قالت عندك حق واش باقي نخفوه
قالتلي نا حالتي مثل الشهدة
بعد ننفرغ مالعسل شهدي يرموه
يحتاجوني كي اعودو فالشدة
او كي تتوسع حد ما يتفكر خوه
فالثورة على فرنسه صعبة كوده
او لستعمار اولادتي جملة رفضوه
ذاك الوقت ايامنا جملة سودا
حين اتتحر ذا الوطن دوري نكروه
امن البارح لليوم ونا مضطهدة
او طعم الاستقلال وقتاش ان ضقوه
حرموني ما شاركوني فالزرده
اوجات القصعة فارغة سهمي لقفوه
الحكم الراشد وين هو وهل المبدا
وين العدل لي تقولو طبقتوه
واحد قاطس فلعسل حتى الزنده
او واحد يحلس في اصبع واستكثرتوه
واحد قاعد في ازرابه ومخده
او واحد في فوق احصير حلفة وسحبتوه
قلتلها في ولادتك كاين عهدة
والحق لي ضاعلك ليك اردوه
هاهم جملو صفهم دارو وحده
او نعطيلك تفصيلها بلاك التوه
مطلبنا مشروع راقد من مده
قطب الجامعة اطلبناه يبنوه
ملينا يا خاوتي طول الرقده
والمشروع لي جي لينا يدوه
واش دارت في حقهم هاذي البلده
او هذا الشعب انتاعها واش اسالوه
نطلب من شبابنا وحده وحده
كي عولنا حقنا لازم ندوه
بالاكم في صفكم تشرك لعدا
وتغير مساركم نحو المكروه
ما نقطع طرقان مانشعل رودا
ما نخلق فوضى الي مبني نفنوه
مانا خرابين مانا هل فسده
هذا الوطن ارواحنا بيها نفدوه
جربنا التخريب في وقت ان عدا
والخير لي ضاع محال نعيدوه
بالقانون نطالبو مانتعدا
ذا المنطق شبابنا راهم فهموه
الحضارة في اصلها منا تبدا
بوسعادة هي مهدها حق نقولوه
والثقافة عندنا ترضى القعده
لو ترحل من عندنا في الوطن التوه
نطلب من حكامنا يكفي شده
هذا المشكل ما يكودش وحلوه
البطال لكان طول يصبح دا
او يصعب عنا وقتاه باه انداووه
لو مطلبنا الجامعه وين العقدة
شفناكم كي تقرو حبس وتنوه
كما بينتو في مدن ياسر عده
اعطونا قفريع للعرض نصونوه
سا سيد الوزير فكر وتهدا
والخزينه معمره علاه رفضتوه

شكرا لك يا شاااااااااااااااااااعر بوسعادة