العاقلة كندرايس

[عطر الملكة]

العاقلة كندرايس للشاعر : الشيخ علي عبد اللاوي
15/02/2007

اطلق اطلق ابني ذاك الجواق ***** خليني نحكي على الدهر الفاقس
اخويا دهر العجب فسد لخلاق ***** شياب و شباب رجعت تتراقص
البرطابل ردنا جملة عشاق***** واحد كيما نا عشق كندة رايس
من بكري يا ليمني راني حراق***** و مول المحنة كي لعمى يسايس
هلكتني و شتيتها قلبي ذواق***** جحمومة و تبان خير من الطاوس
انتبعها وين ما راحت مشتاق***** تعجبني في كل خطاب اداوس
ليها طاعت كل عربان النفاق***** و ليها يركع كل مليك و رايس
مصر و الخليج حكام العراق***** من تلقى عنو يشمر و يطابس
شوفت عيني كي تمشي بترشاق***** الي تعقب عنو يقابلها يابس
حلوا قاع افامهم حد التمزاق***** سمعوا ليها واش قاتلهم يامس
قالتلهم ماناش طماعة سراق***** بوكم بوش لمالكم راهو حارس
راه ابعثني جيتكم جبت البلاق***** خبر الصح ينح عنكم لوساوس
عيد النحر يكون حسب الاتفاق***** كبش العيد يكون ذا النوبة رايس
يوم العيد انقدموا عند الشناق***** في خاطركم كلشي عندي راخس
نفدي بيه جويف ننزع ذي لفراق***** المجرم نشتيه عالعبد الباخس
جابو كبش العيد اخنق يا خناق***** وزع دمو لذا المكالب تتلاحس
هذا هو عيدهم عرب التوزاق***** لعقوبة لمرخفين الملابس
أما نا مازال محتاج الحلاق***** اينقصلي ذا الشيب عني مداكس
انولي لحكايتي كذب و تلفاق***** واش قادي يجري مع كندرايس
بعثت ليا قاتلي كانك عشاق***** بيبي و لا ارواح فايجك خالص
راني نستناك في جبل الوقواق***** بعدك ما نختار لو نبقى عانس
جيب ابن الحومة يسقملك لوراق***** و ما تامنش يعود ثاني منافس
يشتيك و صديق في ظاهر لخلاق***** و المخفية قانت بيها حاسس
لازملكم في محنتي ديرو سباق***** و اللي يسبق خوه هذاك الفارس
هذا شرط كبير اكحلت الساق***** عارف تختاريه عني ذ الناحس
حبيتي فحل الحواشي عالعملاق***** و شرطتي جلباب خوصة و مقاوس
صحة ليه شه فيا يا عشاق***** من يامن لصحاب ينفوه لقابس
المحنة تقسمت ميثال ارزاق***** سعدك سعدك يا طفل جاك ايفارس
انا حلمي قا حبر على الاوراق***** و نتمناه يعود يلقاني ناعس
نحسب روحي قانا ليها عشاق***** يا شعراء صاحبي ثاني فالس
اسمعتوه منين شرشالي زعاق***** تغزلي ببيوت عن ذيك الطاوس
اعليها جاب الكلام و برموا فاق***** قال الشيخ يعود بلاك يداوس
راني جيت اليوم فارح مالاعماق ***** نباركلوا في حبها كندرايس
و القصيدة كلها كذب و تلفاق***** كملنا بيها الوقت الي ناقص
ما يفهمها قالخثير الذواق ***** يعرف شعري زين لكتوبي دارس