لي راهو حاب يجيب الباك بسهولة وبمعدل هايل

[-sabrina-]

السلام عليكم
انا صبرينة عضوة جديدة هنا انا ايضا مقبلة على شهادة البكلوريا هادا اول موضوع ليا حبيت افيدكم ببعض النصائح
اهم شيئ هو تخصيص جدول للمراجعة الكل يتسائل كيفاش ندير جدول المراجعة
اولا نشوفو جدول التوقيت المدرسي ونشوفو اوقات الفراغ الي فيه ونخصوها للمراجعة مدام انت راك في المؤسسة واصدقائك معاك ديرو مجموعات وحلو تمارين وتناقشو فيها و ايضا كيما متقراوش كاش ساعة علاش تقعدو تقسرو وتلعبو بدل ما تضيعو هاداك الوقت راجع فيه مع زملائك ولا تكون ماشي فاهم كاش حاجة حوس على كاش استاذ يفهمهالك ديرو في بالكم بلي الوقت من ذهب وتضيع الوقت ماشي لصالحكم وراهو جاي الوقت لي تكرهو من اللعب والقسرة اصبرو غير هاد كم شهر راهو مبقاش على لباك
دوكا نروحو لاوقات الفراغ يلي في المنزل اكيد كامل نرحو تعبانين اكيد نقعدو نريحو ونستجمعو قوانا بالنسبة للبنات خليكم من المسلسلات ما تبعوهم ما تولو متشوقين للاحداث هادو الافلام الوقت لي تحب تعاودومهم تعاودوهم كي تجيبو لباك تاعكم تفرجو حتى تكرهو هادو الممثلين راهم فارين صوالحهم اما بالنسبة للذكو خلوكم من القعدة تاع الشارع ماراح تفيدك بوالو اقعد في داركم وراجع دورسك في الصيف ادا حبيت متوليش كامل للدار اما استخدام النت خلوه للدراسة فقط النت ماشي راح تهرب
الاوقات الجيدة للدراسة هي الفترة الصباحية ارقدو بكري ومتسهروش باش تقدرو تنوضو صباح نوضو صباح يكون الهدوء ويكون مخك مرتاح وجسمك ايضا مرتاح احسن شيء في الفترة الصباحية هي الحفظ راجعوا ولا احفظو حسب البرنامج لي درتوه ثم صلو واقراو شوية القران لازم الانسان يستعين بالله فهو المعين القدير وهو الذي لا يتخلى عن عباده والصلاة والدعاء طريق للنجاح

هناك نصيحة اخرى ابتعدو عن رفقاء السوء و المشاكل و....و....و.....كل واحد يخمم غير في روحو وفي صوالحوا واحد ما راح ينفعك ولا راح يدوملك غير قرايتك وهادا هو المستقبل تاعك غمضو عينيكم على كل حاجة وياما ناس تبعت ناس لعبو كيف كيف ضحكو كيف كيف وفي الاخير في النتيجة واحد ناجح و واحد راسب

نصيحة اخرى ديما كي متفهمش حاجة ارجع للاستاذ سقسي ومتحشمش متقولش امبعد ونولي ليها ولا امبعد ونفهمها لان هاذا خطأ لا تاجل عمل اليوم الى الغد


اي مرجع اي معلومة متخليهاش تروح من يدك لي تشوفها تفيدك متضيعهاش



انتبهو في القسم وخلوكم من القسرة ركز مع الاستاذ في اي حرف يقولو




ديما دير حاجة في بالك بلي مكاش حاجة مستحيلة اذا ثابرت وخلي تقتك في نفسك عالية ديما قول لي جابوه فاش خير مني ديما دير في بالك بلي كاين زوج تعبو على جالك لي هما والديك لي حابين وليدهم ولا بنتهم يفرحهم





ونصيحة اخرى التغذية الجيدة وعدم ارهاق الجسم






كتـــــــــــــــــــــــابة الدروس ثم كتــــــــــــــــــــــــــابة الدروس والتنظيم طبعا











نصيحة اخرى في اخر السنة ردو بالكم على كراساتكم لانو كاين ناس حسودين ميحبولكش الخير يسرقوهملك باش متحفظش والله غير كاين ناس صراتلهم ههههههههههههههه









ان شاء الله نكون ساعدتكم ولو بقليل وان شاء الله يوفقنا كامل ونجيبو الباك بمعدلات ممتازة
اتمنى ان تدعو لي بالنجاح
سلام