يوميات فتاة جزائرية متجدد

[نينا الجزائرية]

السلام عليكم
بدات الدروس وكل أستاذ يدخل يمدلنا ال programme ومعاه les exposées لي نديروهم وأكيد الدروس كانت هي نفسها هذوك les exposées
لي نوجدوهم أحنا ونشرحوهم لزملائنا والأستاذ يقعد في آخر القسم وفي نهاية العرض يسقسي كاش واحد مافهمش وكي مايلقى حتى واحد رد عليه يقول كامل فهمو وبعدها يطلب من لي دارو العرض يطبعو البحث ويقسموه على الباقي وهكة يكون هو دار لي عليه يعني كانت كامل الدروس في السنة الثالثة عبارة عن مجهودات فردية


في القسم كنت نقعد انا وفاطيمة في طاولة وحدة وبعدنا تقعد فتيحة مع بنت اسمها رزيقة وفي أول بحث لينا كنا احنا الأربعة مع بعض والبحث كان حول
La migration génétique des pupulation
أكيد من عنوانو باين بلي بحث صعيب حوسنا بزااف ودرنا جلسات طويلة في قاعات الانترنت طبعا الجلسات كان يتخللها شوية بحث في أخبار الفنانين باش نديفولو شوية كي نكرهو يعني ماكناش نحسو كيفاش يفوت الوقت بلا مانكملو البحث تاعنا كيما يلزم ولي عجزنا انو مالقيناش بزاف معلومات فات الوقت وماحسيناش بيه كامل حتى بقا يومين ونقدمو البحث بدينا نجروا ونحوسو في الكتب وتماك لقينا معلومات أكثر من المطلوب وماعرفناش كيفاش نوظفوها كنا رح نستسلمو خلاص بصح لي سلكتنا تع الصح هي رزيقة كانت تعرف وحدة لافامي تعها قارية نفس تخصصنا في وهران سقساتها على هذا البحث وقالتلها بلي صحاباتها داروه طلبت منها تبعثلها نسخة منو في الإيميل وهي كانت ناس ملاح مسكينة بعثاتلونا كيما هو واجد يخصو برك الطبع وهذا كان دورنا احنا أكيد
وجاء يوم العرض طبعنا البحث واعطيناه للأستاذة ووجدنا نسخة اخرى مختصرة نعرضوها احنا بواسطة
Power point
جبنا ال
Projecteur
وركبنا ال
Flash disque
وبدينا بالواحدة تقرا القسم لي حضراتو هي وحفظاتو وأكيد مش مهم تكون فهماتو مدام حضرناه في آخر لحظة
وفي نهاية العرض الأستاذة عجبها بزااااف البحث وشكرتنا وحتى الطلبة قالو بلي فهمنا مليح وكان بسيط وموضح وخاصة كي كان فيه بزاف schéma

يعني الكل فهم البحث ماعدا احنا الأربعة لي كنا نقراو فقط في واش كتبنا لأن ماكانش عندنا الوقت باش نفهمو
وصلى اللهم وسلم على سيدنا محمد