مشروبي السحري باللمسة الأنَستازيّة

[أنا ستازيا]

مساء الخير حراير المنتدي

ديما كي نجرب حاجة ونلقاها فادتني نحب الناس الكل يستفادو منها ...

هاذي المرة راح نقولكم على سر نديرو في تحضير جميع العصائر الطبيعية باه تولي صحية اكثر و مفيدة اكثر و طبعا ذوق أحلى ...

السر هو اني نضيف اللوز والزبيب ونستغني اطلاقا على السكر ، الكل يعرف فوائد الزبيب و اللوز ومخاطر السكر (زيدو سقسيو عمي قوقل )

في الليل نحط كمية من الزبيب (قيس فنجال صغير) ننقعها في الماء ونغطيها ونفس الكمية من اللوز ننقعها ثاني في الماء وحدها ونغطيها، الغدوة من ذاك الصباح ندير الزبيب بالماء نتاعو في الخلاط و نضيف عليه حبات اللوز نلقاهم تنفخو و ولاو طريين نقشرهم ونضيفهم بدون الماء لي باتو فيه (لازم نقشرو اللوز خاطر القشور فيهم مادة تمنع امتصاص الحديد والزنك وزيدو سقسو عمي قوقل يقولكم عندها الحق ) ونرحيهم مليح في السرعة القصوى ...

منبعد نضيف اي فاكهة عندي تفاح ولا برتقال ولا موز ولا عنب و لا الكل مع بعض ونضيفلها الماء حسب الحاجة... وحتى وماكانتش متوفرة عندي فاكهة هذاك اليوم نضيف كاس حليب كونديا فقط ولى حليب عادي المهم الشي لي متوفر ونزيد نرحي كلش مع بعض مليح حتى نتحصل على خليط متجانس مانحتاجش باه نصفيه ...

كي نشربو نبقى يوم كامل وانا ناشطة وفي كامل طاقتي ولياقتي البدنية والعقلية هههههه،

هذا هو مشروبي السري بلمستي الانَستازيّة

ان شاء الله تجربوه باه تشوفو النتيجة بنفسكم