لقد ضاع الحلم

[أسامة3]

سلام
ما كنتش حاب نكتب اي موضوع في المنتدى لكن كي شفت نتائج تاعكم والله الى فرحتلكم من كل قلبي
كنتم رائعيين وعاونتوني ولم تبخلوا علي على الرغم من انني لا اعرفكم ولا تعرفونني
لقد كافحت هاذة السنة هذي المرة الثانية وأنا نعاود, malgré جبتوا للمرة الثانية لكن لن يمكنني من تحقيق حلمي الذي اريد, ماتجي قد البلوكاج تاع السنة الجامعية ولا قد التبكار ولا les cours privés, صراحة تعذبت هاد العام والعام اللي فات, لاتعلمون ما مررت به من عذاب, مع كل هذا لكن,,,
صراحة لا أدري ان كنت سأعيد BAC2019 ماخصنيش نزيد نضيع سنوات من حياتي هاذا مستقبل يضيع وخصوصا اننا في دولة تبارك الله,
الحاجة اللي غاضتني وبقات فخاطري هادةك الأساتذة اللي ظلموني والله مانسمحلهم لا دنيا لا اخرة, البعض تأمنو كانو يقولولنا اللي ما يفهمش يدير لي كور والبعض ما يخليونيش ندخل للدروس لكن أعلم أن الله يرى بصح حرام عليهم يقتلوا فيا الأمل والأحلام اللي ملي كنت صغير وأنا نحلم بيهم في ظرف عام, العامين هاذوا أثرو فيا بزاف ومننساش الأحداث اللي صراو فيهم في حياتي كامل,
المهم بدون إطالة بصحتكم كامل واللي ماجابوش راكم ماشي نهاية العالم عاود حاولو ولا يأسوا,
نصيحتي لأصحاب BAC2019 والتي لم يتسنى لي ان اعمل بها وها أنا نادم جدا اللي خصو الامتياز بديو من الأن ما تسمعوش اللي يقوقولكم تعياو ومانيش عارف والله ما يعياوها, بديو بشويا عليكم والحاجة اللي ماركمش فاهمينها حاولو معاها حتى اللي تتيقنو بلي راكم فاهمينها, ما تهملو حتى مادة حتى sport يا الرب الكريم, الفلسفة والله الأستاذ شهاب وبعض المقالات وراك فريتها, التاريخ والجغرافيا محمودي عادل ماللول تاع العام, ماللول راني نأكد ونزيد يا ماللول, اسلامية ملخصات هردولي صغار وشابين, الفيزياء كاين استاذ شريفي فالyoutube والرياضيات نورالدين باينا هاذي, العلوم صراحة كي تفهمها والله الا ساهلة الى ماراكش فاهمها ننصحكم بles cours ماضيعوش وقتكم فyoutube والله الى مضيعة وقت اوعاى الاقل واحد يفهم يفهمكم, والبقية لغات حلو باكلوريات,,,
والله الى فرحتلكم من كل قلبي اللي ربحوا خصوصا وحد سيد دا 17 تستاهل وربي يوفقك تعبت وديت المعدل واللي ما حقوش رغبتهم كيفي ما تيأسوش من رحمة الله بالاك ينقصوا معدلات القبول, بالاك ربي يشوف فينا والخيرة فيما اختارها الله
حبيت نفرغ قلبي وفرغت,,,
شكرا للجميع والحمد لله,,,