احباط تام ، فشلي يرعبني ، هل من أمل ؟

[زهرة وسط أشواك]

حاسة بروحي رح ننفجر
حاسة الباك هذا هم و غم فوق قلبي
لو كان نجوزو و ماننجحش؟
لوكان ناخذ معدل ما يعجبنيش ؟
لو كان نروح تخصص ماشي باغياتو؟
لو كان نستسلم الآن ماشي أحسن ؟
القيود القيود ،،
و نقص الإمكانيات المادية ،لا أستطيع الدراسة في البيت بسبب اخوتي
لا أستطيع الدراسة في الثانوية لأنها غير صالحة للدراسة من كل النواحي
حتى التلاميذ يتشاجرون طوال الوقت مع الأساتذة و المدير و المراقبين
لا أحد "ناوي" على الباك هذا العام
الليكور و ما أدراك ما ليكور .. مستحيل تماما ، الدراسة غالية الثمن
و كذا يدرسون حتى 9 ليلا .. مستحيل و ألف مستحيل
سألت طالبة تجيب 14 عن برنامجها
قالت نحظر ليكور ونحل فيه التمارين ، و لا أدرس إلا " نادرا" في الدار
مالا إذا درست في الدار قداش تقدر تجيب
و عندما أتذكر صديقاتي لا أتذكر سوا كلمة " عيينا عيينا و الكوزينة تستنى فينا "
لا توجد و لا ذرة أمل بالدراسة
حاولت التقرب من فتاة متفوقة معدلها 16
لقيتها لا تاخذ و لا تجيب ، كتومة جدا في العلم
مستحيل تعرفي منها مثلا مصادرها في الدراسة
أصلا كلمة تحفيز ما تقدرش تقولها أبدا
سألتها عن أحلامها و طموحاتها ، قلت بلاك تعطيني شوية أمل قالت لي
ما عندي والو ، يلي جات تجي
قلت لها كيفاش تقراي الفرنسية عادت تضحك و شبعت ضحك عليا
كي شغل حسستني بالانتقاص، و اني أقل منها


أنا مرتعبة تماما ، رغم أني و الحمد لله سريعة الاستيعاب
بعض الأمور نفهمها و هي طايرة و الحمد لله
لكن مع نقص إمكانيات الأساتذة أصبحت سرعة استيعابي عديمة فائدة تماما

أنا مقيدة بالزمن الوقت المعدل العائلة الدراسة الآمال و الإحباط
و خاصة احباطاتي و فشلي طول العام
صحبتي شافت كراريسي في الفصل الأول
3 كراريس 288 مليانين محاولات
كراس علوم ، وواحد رياضيات و الآخر فيزياء
شافت كراس الفيزياء خلعت من التمارين يلي حليتها
ضحكت عليا و قالت " هههه بعد هذا كامل جبتي 2 في الاختبار "
تخيلو جبت 2 في الفيزياء ، 5 رياضيات، 7 علوم
مع أني تعبت و أنا نقرا
عييت عييت و تعبت
الباك التجريبي بعد 10 أيام
نخدملو ولا لالا ؟
اذا خدمت و ما جبتش رح نصاب باحباط أكثر
إذا الأحسن ليا أنو نبقى نكذب على الناس و نقولهم أنو هذي الاختبارات ما تهمنيش
أنا نهتم بالباك فقط ... و يوم يجي الباك و ما نجيبش فيه مليح
رح يسقسوني .. وينهي خدمتك تع عام كامل ؟ قريتي و قريتي ووينهي النتيجة ؟
رح نقول لهم الباك زهر ، فلان كان يدي 7 و6 و جاب الباك عادي
و فلان كان يجيب 14 ما نجحش
ماشي غير أنا !!!