64

[Méé R@l]

السلام عليكم
لندخل مباشرة في الموضوع
متقولوش معندناش الوقت ، الفيسبوك كي تحبو تدخلو ليه تدخلو ، المباراة تلقاو وقت باش تتفرجوها والمسلسلات كذلك .
الباك راكم تحتاجوه ، لا يقارن بمسلسل ولا مباراة ، في بلادنا ثقة بالوثيقة لازمكم شهادة باك ، ناس راهي بلماستر ودكتورة ومش مستعرفين بيها .
خموا لبعيد وفكروا بنضج .
لازم تنجحوا وتغيروا نظرتكم لانفسكم ، شايفين رواحكم متعرفوش تقراو ومتقدروش ، علاش معندكمش عقل كيما الناس .
اعطوا قيمة لقدراتكم . وابنوا انفسكم من جديد .
ديروا ثقة في رواحكم ومتخلو حتى واحد يهزها .
دايمن تضيعو الوقت ، كل يوم تقولو غدوة نقراو ، غدوة نبدا ، ما بديتو ما قريتو . ونهار لي يفوت مراهش يرجع .
المشكلة فيكم ، مشي تلقاو عذر أنا معنديش دروس ، انا ضعيف منفهمش.
مراكمش أصلا تبذلو مجهود ، مكانش لي يخدع روحه .
- رحتو حوستو على أساتذة يفهموكم ؟؟ رحتو شريتو مراجع -تقراو منها ؟؟
- راكم تسهرو ؟؟
- راكم تحلو مواضيع ؟
- شفتو مواضيع البكالوريات السابقة ؟؟
لا
إذن الغلطة فيكم .
قاع خايفين ومهزوين ثقة . علاش ؟؟
عاودو خمو مع رواحكم ؟ كيفاش راكم عايشين ؟ واش هي أهدافكم ؟
لي معندوش هدف محدد لن يصل إلى بعيد .
كون ديرو الباك هدف ريئسي تتعبو وتقراو وتنجحو بعون الله
بصح كي راكم تضيعو الوقت ، وتستناو في معجزة تجي دخل لكم المعلومات بكل سهولة في الراس كيفاش راح تنجحو ؟؟
أسوأ خداع هو خداع النفس