البنت تشتكي والرجل يشتكي

[النجمة القطبية]

والله يا اختي امور الحب والزواج مفيهاش المنطق
صحيح الانسان يختار لكن ربي هو الرزاق
يعني مثلا شفت اراء الاعضاء ولقيت البعض يقولك ان الفقير مثلا ماشي من حقوا يطمع بزاف ويشوف للفوق
مع انوا الواقع يقول غير دلك احيانا يكون رزقه افضل من الغني ادا كان صافي القلب وصاحب نية ربي يعطيه على حساب قلبوا
وكاين اللي يقولك اللي كبيرة وماشي شابة معندهاش حظ في الزواج بشخص جيد لكن انا حسب ما شفت في المجتمع ان الله سبحانه وتعالى بالعكس يرزق اكثر مما يتصور الانسان
يعني مثلا واحد قريبنا شحال وهو يرفض الزواج حتى نهار قال راني لقيت فتاة احلامي منطقيا توقعناها سندريلا لكن بعد ما تعرفنا عليها لقيناها صاحبة جمال عادي وقريبة منه في السن لكن ماشاء الله اخلاق وطيبة
وقصة اخرى لشخص كيما يقولوا صاحب مستقبل يعمل في وظيفة مرموقة في الخارج
ومن شدة اعجاب اموا بيه كانت تظل تمعني على البنات من قريباته ان وليدها وسليم ولاباس بيه ووو ومكالاه تطمعوا نخطبكم هه رغم جمال هادوك البنات اللي كانت تحكي معاهم
حتى جاء اليوم اللي زوجاتوا بفتاة متواضعة الجمال والبنات هادوك تاني تزوجوا بمن هم افضل من قريبهم هداك
يعني كلها قضية ارزاق والواحد مهما اشترط ما يدي غير نصيبوا
وشحال نعرف قصص هكا الواحد او الواحدة تشرط ثم تدي مكتوبها برك !!!
انا مثلا لما كنت عزباء كنت نرفض الرجل الكبير في العمر مثلا في اواخر الثلاثين او الاربعين نشوفوا كبير بزاف وامي كانت تعارضني وتنصحني لكن انا كنت متمسكة برايي بالاك غيري من البنات بالعكس يعجبها وتتمسك بيه وخاصة صاحبات نظرية المراة تكبر قبل من الراجل :d
انا شخصيا نحب التقارب في السن والعقل وكل شئ والحمد لله ربي كريم
انا نقول ربي كي يحب يرزق انسان يسخرلوا امراة تشوفوا احسن رجل والعكس صحيح
فقط تمسكوا بمن بيده الامر كله تدوا واش تحبوا
موفقين