الأمر فعلاً يُقلقني !!

[المُعادلة الصّعبة]

السّلام عليكم
ان شاء الله تكونوا ملاح الله يسهل لنا جميعا يارب
والله ما لقيت كيفاش نبدا موضوعي لأني اصلاً كنت متردده في كتابتو
مي فالاخير ماقدرتش نخليها ونبلعها لانو فعلاً الموضوع اقلقني
كاين وحد الحوايج اسمهم "ارهاق " و"تعب" و"نعاس" و"خمول"طواااال الوقت يوميا
نعيا نركز مع القرايه مي مانقدرش هذاك هو الحد تاعي
نقعد فالبيرو ونبدا نقرا وي
نكون شبه عارفه وش ندير اي نعم
نحل التمارين نفهم على واش يحكي اللي راني نقرا فيه نعم
ولكن والله ماني راضيه على روحي داخليًا لاني حاسه نخدع في نفسي ، منيش حاسه روحي نقرا من قلبي هذيك القرايه تاع الصح النابعه من الاعماق واللي راني حابتها انا
نقرا بوحد اللامبالاة هكا والسبب التعب والانهاك الجسدي لي حاساتو
شيئ مش بيدي ابدًا
رغبتي كبيره جدًا في الدراسة وتحقيق مبتغاي وحماستي لدرجه لا تصور والحمدلله ربي يدومهالي
بصح في كل وقت نجي نقرا نثاوب ونجي نقرا العفسه نبدا نقول هذي واعره شوي نخليها حتى للوقت لي نحس روحي ناشطة و جاهزة للاستيعاب
نحل غير الساهل واللي اصعب شوي من الساهل
مانيش مهيأة روحي باش نطلع فالمستوى
والسبب هو التعب لي راني حاسه بيه معلاباليش اذا تتنوعسوا كامل كيفي ولالا
اي grave
ماعلاباليش وقتا تجي اللحظه هذيك لي نكون فيها ناشطه لي أجلت لها شحال من عفسه بش نقراهافيها
منيش راضيه على روحي ومانيش ندير فيها كـ "عذر" و"سبة" بالعكس حابه نتخلص منها مي ماقدرتششش
الله غالب تقولولي جاهدي نفسك و استنزفي طاقتك ولكن لا يكلف الله نفسا الا وسعها والله ندير لي نقدر عليه مي مانقدرش على الاكثر
اصلا واحد باش يركز لازم يكون مرتاح جسديا ونفسيا
من الناحيه النفسيه الحمدلله الحمدلله غالبا ما يكون مخي فارغ ومهيأ للدراسة وماكانش حتى حاجه ملهيتني بتاتا
من الناحيه الجسدية دايما جسمي تعبان محتاج للنوم
نرقد فالليل من 11 ل 6 ..
حاجا مليحة 7 ساعات منيش من النوع لي ناقص نوم وو...
نضل فاتحة الpc ونشوف لي تلشارجيتو كامل في جميع المواد والله اشياء تعجبني كنوووز لطالما طمحت اني نقرا منها و نتمكن من جميع المواد باش نحقق الحاجة لي اني باغيتها ونضل متلهفة غير باش نوصل للمادة الفلانيه ونشوف الملخصات والتمارين هذيك لي عندي ومهيش عند ناس ياسر الحمدلله
منيش حابه نضيعها ونندم والله ماني باغيه
مي كييفاش
علاش ريان دايما تاعبه وناعسه وناقصه نوم ومُنهكة ،
والله اهم شي الراحه باش واحد يتهيأ يستوعب المعلومات ويركز
درت اللي نقدر عليه حاولت لاقصى حد نركز
بصح تركيزي تاع كيما نقولوا نليكيدي برك نقرا سطحيا مالفوق لفوق ونستنى غير وقتا نكمل باش نرقد وفي جميع الاوقات صاريتلي
مثلا اليوم رجعت للدار ما اجلت ما والو قلت اليوم نقرا seriously

بديت من 1 حتى ل 5 نحل فتمارين رياضيات وحليت 17 تمرين من مرحع الجديد و 40 تمرين من المغني و 5 من الكتاب المدرسي الحمدلله ، بصح وش من حل~_~
اني علابالي بالدرس وش فيه وكلش مي ما تطرقتش للصعيب هذاك وماحاولتش اصلا نتطرق ليه ونقرا بالمرتاح نحل غير فالساهل بيسك تجيني واعره باش نفتح عينيا ونفكر في الحل تاع حاجا جدديدة وصعيبه .. نليكيدي وخلاص هه
وبعدها ريحت شوية وقريت فيزيك حتى ل 8.30 مخي تقفل صح صح ماقدرتش نزيد ايا ريحت

المهم

لنا الله
شكرا لكن من مر من هنا
مش شرط حتى واحد يقلق روحو بحاجه زايده عليه ويريبوندي عليا .. تقدروا تقراوا وتمروا
ادعولي فقط هذا يكفيني ،، جدًا مُحتاجه للدعاء ،
ماقدرتش نشدها في قلبي والله شي مقلقني ومادامني حكيت هاذا كامل مادام قلبي معمر
حبيت نحكي سيتو
ونكون ممنونه لكل واحد دعالي وحاول يساعدني ولو بكلمة
الله المستعان
وفقنــاا الله