فجور اختي سيحدث جريمة في المنزل

[مشكلتي]

السلام عليكم
ارجو من المشرفه اعتماد موضوعي لوجه الله، اقسم لكن ان ما اقوله حقيقه و اننا في كرب لا يعلمه الا الله وحده، خوفي جعلني استجد بكم، استنجد بذوي القلوب الرحيمة بالدعاء، و بذو العقول الحكيمة النصح و الارشاد
قبل ان اتطرق الى مشكلتي، ارجو ان لا تسيئ الي في الردود، ولا لاهلي و والدين بسوء التربيه او انهم عديمي المسؤوليه، لانهم عكس ذلك و لكن اخر العنقود شوه صورتنا و لطخ وجوهنا بالعار 🔫

الحكايه ان اختي الصغيرة في المتوسط بدات تنحرف و تبعت لبنات لمهمش ملاح، كان خويا يعس و يتبع و يتحرى،في تصرفاتها داخل و خارج البيت، و كان يضربها كشما يسمع عليها حاجه او كي يشوفها دارت بلبنات لماشي ملاح، وهي تاخذ رايو و مبعد دير حوايج درقه عليه، و في اخر المطاف بطلها من لقرايه، وهي في لمتوسط يعني لا مستوى ولا مستقبل، قعدت في الدار و بدات المشاكل تزيد اكثر و اكثر، حيث كان عندها هاتف 📱 دايراتو بدرقه، فاق بيها خويا حكمها كتلها بالضرب، يقولك تتربا و لكن والووووو، مطولش و تعمل ديقه وحدوخرا، بعدها لقاها حاله فيس بوك و تهدر مع ذر من كل اجناس و اصناف، زاد حكمها قتلها عينيها زراقو و جنابها منفوخيين ضربه موت داتها من عندو، يسكر عليها في شمبرة و يضربها بمونش بالي، مكانش ليدخل و يحامي عليها، قطع انترنت نحالها جميع وسائل الترفيه، الطابلات و الايباد و الخرجات ممنوعيين عليها،صحاباتها ممنوع عليهم يجوها لدار ممنوع تروح لافامي لازم تخرج مع ماما فقط، عام و هي هكذا، ضو ربي مكانش، دارلها حصار
و بعد فترة وجيزة زاد فاق بيها تهدر مع واحد راح جاب خاوتي و تحماو فيها في 3 رجاله و اليكم الموقف خرجت زرقه متنعرفش ضرب مبرح و ضرب نتاع موت لحيوان و ميستحملوش،
وفي اخر المطاف بعد عدة اشهر وصلاتو هدرة بلي راهي تهدر مع واحد من لفامي، و لكن مصدقش لانووو معندهاش هاتف، راح جاب اختي المتزوجة من دارها قلها فركتيها اي درتلها عمليه تفتيش، لقات عندها بورطابل، و مطور بليتوش و حاكمة بيه لنترنت، ولات تبكي و قالتلها استريني متقوليش لخويا لانو كان حالف كن تلقى عندها بورطابل قلها نشوهلك وجهك و اقعدي مشوهة مدى الحياه، لا زواج ولا صحاب، و دارلها درس في الاخلاق
المهم اختي سترتها و مبغاتش تقول لخويا، قاتلو راني ملقيت عندها والووووو، هو دخلو شك، قلها منيش فاهم مين راهم يوصلوها لبورطابل مالا راهم يتحطو عند باب دار، مالا قرر انو باب دار ينغلق بالمفتاح، سواء كانو داخلين او خارجيين هكا متقدرش تحلو
المهم، اختي عيطت عليها و هدتها قتلها المرة لجايه نسمع بيك درتي اي حاجه والله غير نقولو و نزيد نمدلو تيليفون للقيتو عندك
حلفت بلي متزيدش تعاود، و تابت و بدات تصلي و تقرا القران، مدارتش سمانه سمعتها ماما تهدر دخلت عليها لقات عندها هاتف وحدوخر، ضربتها و قاتلها ماني مك متزيدي تهدري معايا، ولات اختي تبكي و تسلم على رجلين ماما قتلها متقوليش لخويا و استريني 😣، سترتها و خبات لبورطابل،،،
ماما مكانش تهدر معاها قتلها مرضتيني بمشاكل و لقلقه قتلها الا مت انت سبابي
ماما مسكينه عندها سكر و بلانسوليين دائما طالعلها من قلقل بزاف معادش يهبط يوصل سكر حتى 4 غرامات،
و بابا مريض الله غالب عليه و نتمنى من الاخوة و الاخوات الافاضل ميذكروش الوالد في التعاليق لانو مريض، و طريح الفراش يتغدى يرقد و يتعشى و يرقد صلاه و يصليها بصعوبة،
جيتكم شاكيه باه تعطوني لحل؟ تعطوني افكار باه نردع اختي والله راح تصير جريمه في دارنا، خويا راه حالف قال اذا سمعت عليها حاجه يا نشوهلها وجها يا اما نقتلها و ندخل للحبس، المهم نتهنى من فضايحها، ماما راهي تدعي عليها بالموت
و هي مرات توب و تبكي تقولك مهيش بيدي و مرة طلبت من ماما تديها لطبيب نفساني لانها مهوسة بالرجال و مدمنه عليهم، ومتحكمش واحد برك ضال تجري وراهم المهم تهدر وخلاص، ولا واحد من علاقاتها جا خطبها او دقدق باب دارنا
راني خايفه على ماما بزاف، والله علبالي هاذي هي سبتها، حتى انا كرهت اختي معدتش نطيقها او نسمع صوتها، رغم انو ميخصها والو و دايرة لهم و لعار لوالديا
عمرها 20سنه، و فضايحها في كل بلاصه، والله ناس تهدر باخلاقنا و تربيتنا و قرايتنا و علمنا تزوجنا كامل كي طفله كي طفل غير هاذي لراهي مبهدلنا بينا، حسبيا الله و نعم الوكيل 😢