قلب اللوز الاقتصادي و الناجح من مطبخي

[nihal159]

صباح الخير حباباتي، ليوم جبتلكم قلب اللوز ، ان شاء الله تجربوه و أكيد تنجحو فيه لان الوصفة ساهلة و مضمونة و مجربة لعدة سنوات لأنها بكل بساطة وصفة أمي لي معتامدتها من نهار دارت الدار ههههههه
المقادير 3 كيلات سميد خشين، كيلة و نصف سكر، كيلة ماء الزهر، كيلة زيت، رشة ملح خفيفة
الشاربات معروف أنو كمية من السكر مع ضعفها ماء نخلوهم فوق النار لما يوصلو لدرجة الغليان نبدا نحسب15 دقيقة تم نضيف فنجان ماء زهر و نطفي النار.
بالنسبة لتحضير العجين في قصعة نخلط جميع المكونات مع بعض، نتركها لمدة نصف ساعة ترتاح تم نقسمها الى نصفين، نضع النصف الأول في صينية الفرن نذرذر فوقو لوز مرحي تم نضيف الكمية المتبقية من العجين، نقسم العجين بواسطة سكين الى مربعات و كل مربع نزينه بحبة لوز ، ندير السينيوة فالفرن، بعد 20 دقيقة تقريبا نخرج السنيوة من الفرن نعاود نقسم الحبيبات تاع قلب اللوز بالسكين و ندهن وجه قلب اللوز بالسمن الذائب باش يحمار مليح.و نعاود نرجعها للفرن باش تحمار مليح
لما نشوفو ان الحلوة تاعنا طابت نخرجوها و نسقوها بالشاربات البارد، نعوموها مليح و نرجعها للفرن و نقصو درجة حرارة الفرن لأضعف درجة، لما تشوفوها شربت كامل هذاك الشاربات خرجوها، غطوها و خلوها تبرد، لازم تغطوها

خرجتها من الفور درتلها السمن و عاودت قسمت الحبيبات و نعاود نرجعها للفرن باش تحمار مليح

بعد ماخرجتها من الفرن سقيتها بالشاربات