لوبيا خضراء مقلية 🌿🌿🌿باحلى حلة وبنيييينة 🌿🌿🌿

حياة نور الدين · 2017-05-10, 23:43

السلام عليكم

اليوم جبتلكم لوليا خضراء مقلية وعلى بالي كامل تعرفوها مي درتلها لوك جديد هههه تفضلوا

المقادير

لوبيا خضراء الكمية على حساب عائلتك
بيض الكمية على حساب كمية اللوبيا
طماطم حمراء للصوص
ملعقة طماطم مصبرة
زيت، مغرف زبدة، ملح، فلفل اسود، كمون، راس الحانوت، ثوم، ملعقة شابلوغ، فرماج رابي، معدنوس

نقي اللوبيا ونفورها بعدها نقطعها قطع صغيرة
في مقلة ندير شوية زيت ومغرف زبدة وسنات ثوم مقطعين رقيق او مرابيين ونخلي الثوم يتقلى شوية مع الزبدة ومنبعد نضيف اللوبيا تاعنا ونحركها دقائق باش تتشرب الزبدة ونطفي عليها
نفرغها في بول

في نفس المقلاة ندير االصوص تاعنا نحط الزيت والثوم وطماطم مرابية وطماطم مصبرة وملح وفلفل اسود ونحرك ونضيف شوية سكر ملعقة صغيرة ونخلي الصوص طيب حتى تنشف

نرىجع للوبيا تاعنا نضيفلها ملح وفلفل اسود وكمون وراس الحانوت ومعدنوس وملعقة شابلوغ و3 مغارف كبار من الصوص وفرماج رابي ( اللي عندها لحم مرحي او دجاج مفتت او طون تضيف )
نخلط ونضيف البيض بالحبة منخلوش اللوبيا ناشفة او جارية عينك ميزانك انا في رطل لوبيا درت حبة كبيرة

في منقلاة ندير 2 ملاعق زيت يسخن نحط الساركل تاعنا ونعمر اللوبيا فيه ونخلي مسافة للسطح ونفقس حبة ببض وندري عليها الملح ونغطي بغطاء المقلة ثواني ونضيف ملعقة صغيرة ماء في المقلاة باش البيضة اللي من فوق طيب بالبخار والكل على نار قليلة باش البيض اللي مع اللوبيا يطيب وتقدم بعد ما ننزعها من الساركل

انا قدمتها مع فريت والصوص اللي بقات وكل واحدة ودوقها

جربوها جات بزاااااف بنييييينة وحلتها لاحلى شهر اللي هو رمضان وبصحتنا ههههه