تزيين الحسان لإستقبال شهر رمضان

[rowaida18]

تنظيـــــــــف غرف النوم :

إضغط هنا لرؤية الصورة بحجمها الطبيعي.
حضري ادواتك : قفازات ، اسفنجات ، شيفونات ، مكنسة و منشفة ، اكياس قمامة ، طابلية ......

وجدي منتجات التنظيف :

سائل الاواني ، جافيل ، منتج تنظيف متعدد الاسطح ، بيكربونات ، قارص ، خل ابيض .....

تقدري تديري خلطات تنظيف بمكونات مختلفة :
في بخاخ خلطي الثلثين ما و الثلث خل ابيض و ملعقتين سائل الاواني .
او خلطي في وعاء : 1 لتر ما سخون + نص فنجان بكربونات + نص فنجان خل ابيض .

ثم انطلقي في التنظيفات :

1_ ارمي ...افرزي ...احفظي : طبقي هذا المبدا في الخزاين ، لي تابل دونوي ، القجور ....
تخلصي من كل الاغراض اللي ما تحتاجيهاش :
* اللي ما استعملتيهمش من اكثر من سنتين .
* اللي ما تتناسبش مع اسلوب حياتك .
* اللي ندمتي كي شريتيهم و مخبيتهم "au cas où" .
* الي مقطعين او مكسرين و مخليتهم فقط للذكرى او للقيمة العاطفية او على امل اصلاحهم ..
* التحف و اغراض الزينة الزايدة .

2_ نحي الستائر اغسليهم .

3_ نظفي السقف .

4_ نظفي لوستر مع الحذر بقطع الكهرباء و ما توقفيش تحتها .

5_ نظفي الحيوط و البيبان .

6_ نظفي القواطع و لي بريز .

7_ نظفي النوافذ من الخارج و الداخل .

8_ نظفي قطع الاثاث و المصابيح .

9_ نظفي و رتبي السرير و الماتلا و اغسلي الدراوات و المخاد و الزورات و الكوات .

10_ اغسلي التابيات .

11_ اغسلي الارضية بعمق .

(الأخت أم شمسو)