ذقت ذرعا بها

[مشكلتي]

السلام عليكم
أنا معلمة في مدرسة إبتدائية و لله الحمد ربي جعلي قبول و محبة من طرف زميلاتي في العمل متفاهمات مع بعض و نخدموا في جو أسري و خاصة أن مدرستني يغلب عليها العنصر الأنثوي بنسبة 90 بالمئة.
مشكلتي بدات في بداية السنة مع تغير المدير هو في الحقيقة يبدو انسان طيب لكن ما خلانيش نكمل مع قسمي لي خدمت معاه في السنة الأولى و اضطرني باش نحكم السنة الأولى مجددا و أنا الحق حزنت على تلاميذي على خاطر والفتهم من جهة و من جهة اخرى هوما شاطرين ما عدا 4 منهم لي فيهم شوية نقائص.
مشكلتي تفاجأت بالمعلمة لي حاكمة قسمي القديم مصدعتلي راسي يوميا تستدعيني لقسمها و تشكي منهم مرة تقولي راهم ما يعرفوش كامل الحروف و ما يفرقوش بيناتهم مع أنهم العام لي فات في نهاية السنة كانوا يقراو نصوص كاملة باسترسال و مرة تقولي ما يعرفوش يكتبوا و مرة تجيبلي الألواح تاع التلاميذ و تقولي شوفي كيفاش دايرين ولادك راني مشوكية منهم المهم أنا خلاص قلبي طلع منها ما عدتش نحمل كلامها قلقتني بزاف مي خليتها في قلبي و اليوم استدعاتني و كي رحت ليها قالتلي دوري على ولادك و شوفي ما يعرفوش يكتبوا جملة سليمة بدون أخطاء أنا ثم خلاص تقلقت و قلتلها و علاش في عام الذراري يعرفوا يعبروا و يكتبوا بدون أخطاء إملائية امالا واش يقعد يدير معلم السنة الثانية و الثالثة وووووووو يقعدوا يديروا رجل فوق رجل و يتفرجو عليهم ! ثم المدير دخل فجأة للقسم و أنا ملقلقة قلتلها هاهو قدامك المدير إذا ما عجبكش القسم رجعيهولي و أنا نعرف نعالجهم المهم المدير ناض يقول راكم فريق تربوي واحد و مالازمش تكون هذي الحسابات بيناتكم و قالي لي مالازمش تكوني حساسة و لازمك عادي تتقبلي النقد أنا ثم خلاص مخي طار سورتو كي قالتلو لالا الشيخ انا عيطلها غير باش نسقسيها كيفاش نعالجهم على خاطر هي أكثر خبرة مني ! قلبت كامل الموقف .
قولولي ربي يعيشكم كيفاش نقنع المدير يرجعلي قسمي و كيفاش نفهموا بلي فهماتوا الموضوع بالخطأ .
مع العلم أن هذي المعلمة مكروهة من طرف جميع المعلمات من كثرة ستاتتها سورتو قدام المدراء