غايضتني روحي

[مشكلتي]

السلام عليكم و رحمة الله تعالى و بركاته

حبيت نحكي واش كاين في قلبي
اللي راني فيه ما عندوش حل
ما نقدر ندير حتى شيء
غير الدعاء
و المشكل راني في مرحلة يائسة بزاف
و كارهة حياتي


انا راهي غايضتني روحي بزاف مش عارفة كيفاه نزيد نصبر
قداه من عام و انا نصبر و ندير في الاسباب و نقول هذا العام تتحل
و هي راهي كل عام تزيد تتعقد اكثر و يزيد يكبر همي اكثر
البنات اللي كانو معايا في الجامعة كامل تزوجو و باولادهم و دارهم و انا مازال نعاني
هذا رزق ربي و مانيش حاسدتهم او غايرة منهم
لكن ما نسمع بوحدة تزوجت او راهي بالحمل نتفكر روحي
و تغضيني روحي بزاف
ما نعرف لاه كنت نفكر اني رايحة نتزوج بسهولة و ان هذا الشيء بديهي، حبيت نحافظ على نفسي من الذئاب البشرية و نقرا و نثقف روحي و نتعلم على اساس النهار اللي نتزوج فيه
ما كنتش نفكر غير في الزواج لكن كان في راسي
حتى مع الاعوام ننقى البنات اللي معايا كامل تزوجو و راهم باولادهم
و انا مازالني
البنات اللي كانو معايا يقولولي كيفاه ما تزوجيتش؟
انت خير منا و تستاهلي كل شيء
و باهية و متخلقة و عاقلة و رزينة
صح وحدة كما تكون باهية بزاف الرجال يخافو يروحو يتكلمو معاها؟
هما يقولي هكذا انا يزيد قلبي يوجعني على نفسي
ما نعرف لاه فكرت اني رايحة نتزوج و هذا الامر بديهي
و هذا رزق ربي سبحانو

راني نحكي برك
قلبي تعب
غايضتني روحي

ربي يفرج