مانشبهش للنسا

[مشكلتي]

السلام عليكم
الانسان لي طول عمري نشوف فيه من بعيد و ندعي في ربي سرا يكتبهولي جاني اخيرا حكا مع بابا و درنا رؤيا شرعية و قالي حاب نخطبك فرحت بزاااف مصدقتش روحي

لكن قالي حاجة خلاتني بعد طول تفكير نقرر نرفضو وانا ربي يعلم قدماه حاباتو

هو واااعر بزااف لكن راجل بكل ما تحمله الكلمة من معنى استاد محترم و امام و حافظ لكتاب الله و سبحان الله عطاه ربي جمال تقول ماراهش من الانس والله تقول ماراهش من هاد الدنيا

المهم طلب مني نلتزم بالحجاب الشرعي و انا قبلت و قالي انا حاب نجيب مرا تاع الصح لداري قتلو واش معناها ؟

قالي المرا لي راجلها ياكل برا ماهيش مرا قالي لازم من نهارها لول تكون تعرف تطيب كلشي قالي من اليوم لول نحب كي ندير عرضة للناس تقوم بكلشي وحدها تعرف تكسكس و تدير الشخشوخة و الكسرة قالي و تكون دارها نظيفة تشعل و راجلها حوايجو ديما يشعلو و هيا في روحها تكون قايمة بروحها و و و صوتها ميتسمعش

قتلو الطياب بشوية نتعلم قالي المهم انا نهار تدخلي داري نحبك تعرفي كلشي قالي كون ندوق ماكلة و متعجبنيش نوقف و نخليك قتلو كي تدير عرضة تعاوني ماماك ولا ماما قالي دارنا و داركم يجونا ضياف و الكوزينة و شمبرة النوم مايدخلهم واحد غيرك انتي قالي و تاع كل يومين اديني لدارنا مندركا انسيها

هو متشدد قالي كون تروحي لعرس و نشوف من بعيد راجل قرب قالي نتعارك معاهم و نقلهم مرتي امانة عندكم و انتم مش قد الامانة و منا لجاي اسمحولي منزيدش نحضر لمناسباتكم


المهم كلش نورمال نقدر عليه غير حكاية الطياب انا في دارنا مدللة صدقووني والله القهوة منعرفش نطيبها و انسانة فوضوية لابعد الحدود حوايجي ديما مطايشين اوراقي المهمة دايما مودرين وين نروح ننسا لاكارت و البرمي خزانة ملابسي كون تفتحها يطيح كلشي فوق منك يعني من الاخير ريحة المرا مافياش عطاني ربي الزين و العقل و القراية فقط و جربت نبدل روحي والووووووو


المهم انا صارحتو قالي عندك 7 اشهر في يدك بدلي من روحك نهار لي تدخلي لداري مانتنازل حتى على شي
انا خممت مع روحي مليح و لقيت كون نروحلو نطلق في ششهر فقررت نخليه يلقا لي توالمو

واش رايكم ؟؟؟