المشوشة في الصوص الحمراء طبق فخم من اعالي جرجرة لعيون بنات الجلفة

[انا هي رزيقة]

السلام عليكم حبيباتي. اليوم جبتلكم طبق فخم من مخاميخ نساء جبال جرجرة . ياخي تسمعو بالكيك الحلو لي يقدر يتحول الى الكيك المالح لي يديروه بالخضر و البيض و تسمعو بالبوراك بالكفتة و الفرماج لي يقدر يتحول الى سيغار حلو معسل محشو باللوز . امالا جداتنا تع بكري كانو ايضا مبدعات . كلكم تسمعو بالمشوشة بالبيض التي تأكل مع العسل االله االله و يحطوها للنافسة .نسا بكري تاعنا زادو عصرو مخهم و قالو وعلاه منديروش منها طبق مالح فيتاميني يؤكل كطبق رئيسي فاخترعن هذه التحفة

هذي يسموها مشوشة بالصوص او "تحبولت نتملالت ". طبق بنين وفيتاميني هوفي الاصل طبق شتوي ياكل سخون تم تم تحسي السخانة طلعاتلك من تحت لفوق ....خخخخخ ويولوخدودك موردين االله االله ....خخخخخ . ويقدم ايضا للنافسة لانه فيه بيض ومدرللحليب . ولي متحبش تطلعلها السخانة تاكلها تياد خير ....خخخ
طريقة تحضيرها ساهلة ماهلة ومكوناتها متوفرة واقتصادية كيما كامل الاطباق القبائلية لانهم اناس عايشين في الجبال وبعادعلى المدينة والاستعمارقطع عليهم الطرقات لعزلهم فكانو مضطرين يعيشوبالموجود دون حرمان انفسهم من كل المكونات الضرورية للجسم . وبما ان الحاجة ام الاختراع فهم ابدعو فعلا في أطباقهم ومكوناتها لي كلها صحية ومتوازنة . خلاص كمل الدرس دوك نروحو للتحضير ....خخخخخ

المكونات نحتاج بصلة متوسطة و حبة طوماطيش(مصورتهاش) و حوالي 4 الى 5 فصوص ثوم و ملح و فلفل اكحل و فلفل عكري و راس الحانوت و ملعقة صغيرة طماطم مصبرة و قطعة صغيورة من شحمة العيد يمكن الاستغناء عنها لكن حنا نحطوها تغلي غلوتين في الصوص ثم نحوها

نضع كل هذي المكونات في طنجرة واسعة( اومبعد تفهمي وعلاش) و نقليهم مليح ثم نمرق الى نصف الطنجرة لانه رايحين نحطو قرصة المشوشة داخل الصوص و رايحة تشرب الماء ثم نرمي في الصوص قرنين فلفل احمر يابس يعطي نكهة و زيدي شوية نعناع يابس مفتت و نخليها تطيب .

من جهة اخرى نحتاج 9 بيضات و 8 ملاعق كبار سميد رقيق و واحدة لوفور و نعناع يابس تطحنيه مبين صباعتيك و زيت. هذ الكمية تمد قرصة كبيرة انتي تقدري ديري نصف المقادير باه تتحصلي على قرصة اصغر
في اناء حطي 8 ملاعق سميد مع قرصة ملح و النعناع و من جهة اخرى حطي زيت زيتون مخلط مع زيت عادية(حوالي نصف كاس) في كاسرونة حتى ت سخن مليح ثم فرغيها على السميد هكاك سخونة و خلطي بلمعلقة باه يتبسس السميد جيك شغل رايحة تديري المبسس بهذا الشكل

ثم كسري البيض تاعك و خلطي وزيدي اللوفور و خلطي مليح

من جهة اخرى تكوني وجدتي مقلاة فيها زيت مشي بزاف قيس م ثلاث ملاعق كبار بهذ الشكل

خليها تسخن ثم ارمي الخليط تاعك في المقلاة برفق و غطي عليها . النار لازم تكون قليلة باه تطيب المشوشة مليح

. بعد حوالي 2 الى 3 دقائق طلي عليها تلقايها بدات تطلع طلي على الاطراف باسباتولا به تشوفي اذا بدات تتحمر. كي تشوفيها تحمرت. وجدي مقلاة اخرى بنفس حجم الاولى و ديري فيها قيس 3 ملاعق زيت خليهم يسخنو مليح مليح ثم ارمي الزيت مباشرة فوق وجه المشوشة تولي هكا

ثم اقلبيها برفق في المقلاة الاخرى على هذاك الوجه هنا خذي حذرك اختي اخدمي فوق ليفيي باه متقسيش روحك بالزيت و غير بالعقل عليك.

هيليك المشوشة كي نقلبوها

هنا عسي عليها طلي عليها بالسباتولا حتي تشوفيها حمارت

تكون الصوص طابت دوقيها كاش متزيدي ملح ثم نحي هذوك الفليفلات و ارمي داخل الصوص القرصة تاعك كاملة برفق باه متطرشيش روحك بالصوص. هيليك

ارفدي موس و ثقبي به القرصة في عدة اماكن باه تتشرب من الصوص رايحة تسمعيها تبقبق ......خخخخخ نقصي على النار . بعد حوالي 5 دقائق قطعيها بالموس الى 4 قطع دائما داخل المرميطة و خليها تزيد تطيب و تتشرب من المرقة حوالي 10 دقائق رايحة تلاحظي انها تزيد في الحجم علابيها قولتلك لازم طنجرة واسعة باه تديلك كامل قرصة المشوشة .
لازم تبقالك شوية صوص داخل المرميطة سينو غلي شوية ماء و زيديه و ذوقي و شوفي كاش متزيدي توابل . هنا خلاص طابت

قطعيها مثلثات كيما القاطو و سربي كل مورصو داخل طبسي عميق مع شوية صوص و بطاطا . و صحتين و هنا على قلوبكم . دعوة خير ليما لي علمتني هذ الوصفة تكفيني و لكن بالمثل حبيباتي