قرتان البسباس بالدجاج والبيشاميل خفيف وآممممم

[om kamilia]

السلام عليكم ورحمة الله وبركاته

بسم الله الرحمن الرحيم



اليوم جبتلكم قرتان خفيف بالخضر الموسمية ان شاء الله ينال اعجابكم
( البسباس) مليح مع لعشا, و ما ننساوش البسباس ذو فوائد كثيرة

نمر للمقادير:

بسباس حسب العائلة
ثوم
ملح, فلفل اسود
فطر ( اختياري)
دجاج طايب( أنا استعملت بقايا قطعة دجاج طايبة) تقدرو تعوضوها بلحم مرحي .
ولآ تطيبو نص صدر دجاج حسب العائلة في ماء ملح , فلفل اسود حتى يطيب نفتوه
صلصة البيشاميل
معدنوس للتزيين

طريقة التحضير:


ننقي البسباس , ونغسلوا طبعا في ماء مع شوية خل ونشلوه, نقطعوه انصاف او الى 4 , نتبلوه بفلفل اسود, ملح, وثوم مسكرفجة وعصير ليمون باه يحافظ على لونو, نخلط مليح , نفوروه لمدة 10 الى 15 دقيقة .










في هذاك الوقت نحضرو صلصة البيشاميل كما موالفين
انا طريقتي نرابي فص و 2 ثوم نزيد ملعقة كبيرة زبدة او مارغارين قيس ما يتقلى شوية نضيف ملعقة اكل فرينة ونزيد نحمص غير شوية, بعيدا عن النار نضيف نص ليتر حليب, نخلط حتى تبدى تعقد نضيف حبة جبن او 2 ورشة ملح خفيفة مع فلفل اسود

الفطر نحمصوه غير شوية مع فلفل كحل و رشة صغيورة ملح و فص ثوم

الجاج نفتوه , و لآ لحم مرحي نطيبوه كما موالفين مع بوراك



في بلاطو تاع الفرن نستفوا البسباس نضيف الفطر و الدجاج المفتت, ونصب البيشاميل عليه , ونطيبو في فرن سخون حتى يتجمر , نزينوه بالمعدنوس و جبن مبشور


[IMG]ttp://up.1sw1r.com/upfiles2/lhh66669.jpg[/IMG]













ان شاء الله تعجبكم الوصفة وتجربوها

انا قدمتو مع شربة فريك , وانتم كما تحبو



بالصحة و الراحة

فقط بالنسبة للملح خذو حذركم الجبن مالح



دعوة فقط لاخي بالشفاء و تيسيير أمور أخواتي