غريبيتي بالكاوكاو
كيلة سمن المدينة ذايب وبارد 4 ساعات في الثلاجة ومن بعد نحيه حتان يطرا بحرارة الغرفة
3 كيلات فرينة سيم مقلية على طريقة الغالية لايدي
كيلة غير اصبح سكر قلاصي المرجان
كيلة كاوكاو مقلي محمر وبالقشور
ليلة من قبل نذوب السمن ونبردو ومن بعد نجبدو يبات في الكوزينة باش يطرا مليح ونقلي الفرينة ونغربلها ونبيتها باش تبرد مليح والغدوة من ذاك نخدم كلش يجي ساهل
نحط في البيترا السمن والسكر قلاصي ونخبط بال k مليح مليح حتان يبياض الخليط ويطلع نضيف من بعد الكاوكاو والفرينة ونبقى نخبط راه تيبس العجينة ومن بعد ترجع طرية روووعة والبروفيسيونال كي طاطاكم احم احم ههه ديما نزيد تقريبا كاس فرينة تجيني سوا سوا وانت اذا خفتو اكتفيو بالثلاث كيلات فرينة النتيجة وحدة وعلاش نحب نشيحها شوي?? باش ماتلصقش في الطابع فهمتوني
نطبع غريبيتي ونطيبها على فرن ساخن ونحل الباب تخرج السخانة القاوية ونخليه مفتوح لحظات ونحط الغريبية على حرارة ناقصة للخر ونطيبها 20 دقيقة الى نص ساعة
نخرج الغريبية من الفرن ونخليها تبرد مليح مليح واذا مزروبة ندخلها للثلاجة تحكم روحها روووعة ونخرجها ونفوت السنيوة على النار خفيفة ضرك يطيرولي الحبات بسهولة وتبقى حاكمة روحها رووعة واذا ماكيش مزروبة خليها تبات في السنيوة تاعها تبرد مليح والغدوة من ذاك ديريها في ليكيسات ولميها ماتتفتتش ابدا
( تقرير عن مشاركة سيئة )، و الموجودة أسفل كل مشاركة .
2016-04-28, 09:05
العرض الشجري