مبرجة طايبة علي بروميي ايتاج رووووووعة

[ايمان يمن]

هذي المبرجة حقيقة تذوب في الفم ان شاء الله تجربوها..
المقادير وطريقة التحضير :
في اناء خلطي 250غ مارغرين مع نص كيلة زيت(الكيلة بباطة المرغرين نفسها) زوج شكاير فاني مغرفة صغيرة ملح زوج مغارف كبار سكر ومن الافضل تخلطي بالباتور.كيولي الخليط كريمي ضيفيلو كاس حليب بارد وخلطي مليح زيدي كيلة فرينة مغربلة مع نص شكارة خميرة القاطو و5 كيلات دشيشة يعني سميد خشين واذا خصك زيدي شوي علي حساب الدقيق يشرب ولا لا المهم تتحصلي علي عجينة طرية تقسميها لزوج كريات وتحطيها تبرد 10د في الثلاجة.








الغرس 500غ تنقيه تفوريه تزيديلو نصف شكارة خميرة وزوج مغارف زيت واي نكهة تحبيها ان شخصيا مازدتلو والو نشتيه طبيعي.
تقرصي العجينة الاولي وتقرصي الغرس وتحطيه فوق القرصة الاولي وتغطيه بالقرصة الثانية.لازم التقراص يكون فوق النيلو باه يجيك ساهل.حلي العجينة حسب السمك ليتحبيه وتقسميها بالمول.
نرجعو لطياب انا قلت المبرجة طايبة علي بروميي ايتاج علاه؟ لانك لازم تحطي طاجين الطين فوق النار وتزيدي تحطي فوقو نتاعالحديد.الطريقة هادي طيب المبرجة من جميع الجهات وتجي حمرا وماش محروقة.
شهية طييييييييبة.