غراتان باذنجال

[سيرين 5]

غراتان بــــاذنجال ممممم بطريقة صحية و شهية

1- نقي الباذنجال و قطعيه شرائح (من الأحسن الشرائح تكون غليضة باش ما تلسقش و تتحرقش) و ستفيه في صينية بها ورق الطبخ و في كأس حطي ملعقتين زيت زيتون



2- نرشوه بالملح و ندهن سطح الشرائح بزيت الزيتون و إلى الفرن



بالنسبة للاصوص بلونـــــاز
3- في مقلاة رابي بصلة صغيرة + ملح فلفل أسود + كمون + م ك زيت زيتون و قلي البصل على نار قليلة



4- كي يتقلا البصل حطي الداند آشي أو الفيوند آشي أو صدر دجاج مرحي (طبعا لازم يكون بدون دهون) + معدنوس + ثوم



5- كي يتقلى حطي 2 أو 3 طماطم رابي + م ك طماطم مصبرة + عرف زعيترة و خليها تتقلى مليح



6- كي تنشف زيديلها شويا ماء باش تجي فيها لاصوص و هايليك هنا واجدة



7- في هاذ الأثناء تكون شرائح الباذنجان طابت شعليلها من فوق باش السطح تاعها يزيد يتحمر (إذا تحبي ما تحمريهاش عادي الباذنجال طايب و بنين كيما المقلي)



8- في كسرونة حطي ملعقتين كبيرتين فرينة الشعير (شريتها البارح 70 دج للكلغ) + شويا حليب منزوع الدسم بارد + ملح + فلفل أسود و نخلط حتى تذوب الفرينة و نزيد كمية الحليب



9- نحطها على النار مع التحريك المستمر حتى تعقد ( لي عندها جبن 0% تقدر تستعملو أنا ما كانش عندي ما حطيتش)



10- نأخذ المول لي راح ندير مرحلة المونطاج فيه و نحط طبقة باذنجال



11- نزيد طبقة من صوص بولــوناز



12- و نزيد طبقة بيشامال



13- و نكمل الطبقات بنفس الطريقة حتى نكمل الباذنجال و آخر طبقة تكون البيشامال نوزعوها على كامل السطح و إلى الفرن



14- و هايليك هنا بعد ما طابت و تحمرت ممممممم نموت على الباذنجال ههههه



15- و قدميها بالصحة و الراحـــــــة



16- و في الليل حضرت كأس تيزانة زريعة البسباس بدون سكر




شفتو ما حرمتش نفسي و عائلتي من الأطباق الشهية و في نفس الوقت صحية نتمنى تجربوه علاجال بزااااف بنين مع العلم أني ما درتلوش الفرماج و ما فيهش حريرات بزاف كيما الوصفة الأصلية