[[ سذاجة .. براءة .. وجمال الطفولة .. ]]

[nihal159]

لما كنت صغيرة ممكن في عمر 4 أو 5 سنوات؛ كي نتفرج على فيلم و في الأخير البطل الشجاع؛ الشهم؛ فاعل الخير يموت بطلقة رصاص أو طعنة خنجر غادر؛ نقتل روحي بالبكاء و نلوم ماما علاه خلاّتهم يقتلوه و نقوللها بالحسبة هذي الناس لملاح لكل ماتو؟ شكون لي يبقى يدافع علينا؟ كي عادو في كل فيلم يقتلو رجل شجاع كاش نهار يوصلو لدارنا و يقتلو بابا(بعيد الشر).
وعلابالكم النية هذي ماكانش في الجيل الحالي؛ لأني في يوم من الأيام وحنا نتفرجو في فيلم؛ قتلو البطل بالرصاص؛ وكان معايا ولد سلفي عندو 5 سنين؛ قلتلو آه مسكين الرجل قتلوه و مات؛ علابالكم واش قالي؛ قالي: واش بيك هذا تمثيل برك؛ والدم هذاك راهو كتشووب؛ من بعد الممثل ينوض ويزيد يمثل فيلم جديد؛ قالي واش بيك طاطا خفتي؟؟؟؟
قلتلو يا ولدي ماخفتش؛ إستغربت برك؛ واحد فينا مش نورمال يا أنا يا أنت.