اول مواضيعي مربى البرتقال المنزلي

[بنت النخلة]

السلام عليكم
هادي اول مرة ندير موضوع في قسم الطبخ بالرغم من انني دايما ندخله ونستفاد من وصفات وافكار العضوات ربي يخليهم جميعا
وياريت تعجبكم مشاركتي معاكم
ومتعلقوش عليا
نبداو بسم الله
بما انه موسم البرتقال قلت نشارككم بوصفة نستغلوا بيها هادي الفاكية الموسمية الرائعة وهي المربى او الكونفيتير
ومكاش كيما مربى المنزل الي مافيه حتى اضافات صناعية
وهادي الوصفة خرجت بيها بعد ما سمعت الكثير من الوصفات من العديد من الشيفات ...

اولا باش ينجحلنا المربي نحظرولوا اسباب النجاح وهي :
اولا نعقموا البلارات الزجاجية الي راح نديروا فيها المربى باش ما يفسدش ويشدلنا مدة طويلة
نديروا الماء يغلي في قدرة كبيرة ونحطوا البلارات يغلوا مدة دقيقتين او ثلاث هوما والمغالق تاعهم من بعد نرفدوهم بحذر ونحطوهم على شبك باش ينشفوا وحذاري نلمسوا باليد في داخل البلارة باش ميخسرش التعقيم
وممكن ندخلوهم للفرن يكون شاعل باش ينشفوا او نقدموهم للمدفاة كيما درت انا

المهم لازم نتاكدوا بلي نشفوا مليح
بعدها نحظر كمية البرتقال لي نحبوا نديروها
ويكون نفس الكمية سكر عادي
حبات قارص حسب الكمية
بمعنى وزن البرتقال نفسه سكر
انا حظرت ثلاثة كيلوا ونصف برتقال ابو سرة او طامسوا نغسلوه مليح ونخلوه ينشف
مع حبتين قارص
ثم نقشروا الشينة بالقشارة كيما البطاطا

ونحتفظوا بالقشور ولاكن بدون الجزء الابيض


بعدها ناخذ الشينة ونكمل نقشرها كيما نقشروا الشينة باش ناكلوها
وبعدها نقسم الشينة بالموس قطع صغيرة ونحطها في اناء واسع ونزيد نقطع هادوك القشور قطع صغيرة ونضيفوهم للشينة واذا حبيتو ضيفو قشور حبتين القارص كذالك كي نكمل التقطيع نضيف كمية السكر ونخلط مليح




بعدها نخليها تبات ليلة كامل في الثلاجة ومن الاحسن نديروها في وعاء زجاجي هكداك ميتفاعلش مع الشينة ونغطوه ب السيلوفان


وهدا بعد ما باتت ونحيتها من الثلاجة


في الغد نفرغوها في قدرة كبيرة ونرفعوها على نار متوسطة ونخلوها تغلي مع التحريك مرة على مرة مدة ساعتين تقريبا ومرة على مرة نحي الرغوة لي تطلع على الوجه
وللامانة انا في نص الطياب تاعها ميكسيتها بالبرا او الخلاط اليدوي
وهادي الخطوة موش مهمة فقط باش ما يبقاوش قطع وكاين لي يحبو تكون هاديك القطع في الكونفتير وانا منهم ولاكن عايلتي يفضلوه يكون متجانس


ولما تشوفي الكمية نقصت الى ثلاثة ارباعها تقريبا او اقل بقليل ضيفي عصير حبتين القارص
وخليها تغلي مدة خمس الى 10 دقائق وطفي عليها
خليها تهدا قليلا
وهذا شكل وقوام المربى




ثم عمريها في البلارات بواسطة مغرف السقو او اي قاميلة صغيرة عندك في البيت واغلقيها جيدا




وخبيها في خزانة المطبخ
وتاكلوه بالصحة والهناء
يقدم في الفطور مع قطعة خبز من القمح الكامل
او تستعملوه في التحليات
انا بقالي لعام لي فات مدة 6 او 7 شهور وماصرالوا والو
واي استفسار اراني هنا

واذا عجبتكم الوصفة دعوات الخير ليا ولوالديا
بنت النخلة