السلام عليكم
لا اطيل عليكم هذه الحكاية ولكم التعليق
جاء خويا غرفتي بش يفيقني من النوم.. عيطلي ماجاوبتوش زااد عاود عيطلي ماجاوبتوش بدا يحرك فيا و يعيطلي و يجبد فلغطاء و مافقتش.. طبس راسو عليا و يستنا فالنفس تجي و تروح عليا .. بدا يقرص فيا و مافقتش.. بداا وجهو يصفار حتى عيط لماما ماماا أرواحي أرواحي.. جات ماما بدات تفيق فيا و كيف كيف جامدة في فراشي.. جاا خويا صغر مني حط يدو على قلبي يتحسس وبدا يعيط ماتت ماتت شدتني الضحكة بصح مضحكتش .. ماعرفتش علاش مقدرتش نتحرك و لا نتكلم.. جاا بابا مصدوم و حاير.. شويا هكا سمعت صوت الامبيلونص هزوني فيها و وغطولي وجهي.. في هديك الدقيقة عرفت بلي أنا مت.. مافيهاش لعب .حرت. ماكانش في بالي هاد الشيئ. على أساس كنت ساهرة البارح على الفيسبوك مبعد رقدت .. جاب ربي و الزهر نضت صليت الفجر و رجعت رقدت.. اليوم بش نغيب على قرايتي و على صحاباتي ، كنت زعما باش نعيط لبنت خالي نسقسي عليها وكيفاه تجوز ففترة وحمها ،، مبقاليش الوقت بش نقول المودباص تاع الفيسبوك و البورتابل لخواتي..
رجعوني للدار و دخلوني لبيت. دخلت عليا ماما و خالتي و مرا أخرى كبيرة و حطوني فوق طابلة لوح كبيرة عرفت بللي رااهم يغسلو فيا... آخر مرة نحس بلمسة يدين ميمتي . مبعد حطوني في كفن أبيض.. دخلوني لصالة معمرة نسااا.. حسيت بوجود خاوتي و عايلتي و دارنا و صحاباتي و جيراني. كل خايفين.. حايرين.. يبكو و مصدومين.. باانت في نيفي ريحة الموت.. أول مرة نشوف بابا يبكي .. بداو يدورو عليا كل مرة واحد. اللي يبوسني و اللي يسامحني.. دخلو عليا كل كيما راهم.. في هديك الدقيقة دخلت عليا ماما تمسح على كفني بيدها و دموعها على وجهي تمنييت دقيقة وحدة نبوسها و نبوس جبينها و نطلب منها السماح و نطلب رضاها عليا.. المهم هزوها من فوقي بالسيف و جاا خويا و هزوني و حطوني فصندوق و حطوني على شحال من كتف و بدااو يعيطو الله أكبر.. الله أكبر... حطوني فطوموبيل نقل الاموات.. نسمع فصوت. ماما تعيط. خالاتي فاميلتي جيرانا... ديمارات الطوموبيل و داوني للجامع لي حدا الدار جامي دخلتو وتمنييت ندخلو و اليوم داخلاتو كالميتة فتابوت هازيني على لكتاف...
صللو العصر مبعد نسمع فالإمام يقلهم جنااازة امرأة.. ناضو كامل بش يصلو عليا.. و فالصف لول بانولي عايلتي الكل جمعتهم اليوم بش يصلييو عليا.. المهم بعد الصلاة بداا الإمام يدعيلي بالرخمة و بالمغفرة.. و مبعد هزوني و حطوني فالطوموبيل و مادييني للجبانة..
هبطوووني.
القبر محفووور!!! وش هاد الزربة بالخف حفروه!
هنت عليهم.. على صحاباتي.. على عايلتي.. على اللي يحبوني.. على بابا على خااوتي.. ! يبكوو عليا بالدموع و بش يحطوني فهاد الحفرة.. بصح ما عندي ماندير.. هزوو التابوت و نزلوني فهاديك الحفرة.. ماخللولي والو حتى بورطابلي مخللوهوليش..
كانت أول مرة نحسد صحاباتي فيها.. حسدتهم على الوقت لي بقالهم.. حسدتهم على الصلوات و الصيام لي بش يديروهم بعدي.. حبيت نبكي فهديك الدقيقة حبيت نعيط و نكسر هاداك التابوت.. مش حابا نموت درك مازال مادرت والو فحياتي.. وش رااح نقول للملكين عند السؤال. بش يوقفو حدايا و يسقسوني على حياتي فواش و كيفاش ضيعتها.. حياتي فاتت. تمنيت هديك الدقيقة نرجع اللي فااات.. رجعو عليا التراب و راحو هكا كيشغل مايعرفوني ما عرفوني في حياتهم.. و
" يا أيتها النفس المطمئنة. ارجعي الى ربك راضية مرضية و ادخلي في عبادي و ادخلي جنتي. قولو الله اهدينا الى ما ترضى..
فصة منقولة
( تقرير عن مشاركة سيئة )، و الموجودة أسفل كل مشاركة .
2016-01-23, 07:29
حكابة ابكتني
العرض الشجري