هل قرار والدتي هو الحل؟

[مشكلتي]

السلام عليكم و رحمة الله وبركاته

نحكيلكم بالمختصر و ياريت من عنده تجربة يفيدني بنصائحه.

عندي أخي عمره21 سنة عايش مع والدتي و والدي، و 2 إخوة متزوجين في الخارج و أنا متزوجة بعيد على أهلي المهم، أخي منذ أن كان في المتوسطة بدأ يتبع أصحاب السوء و إستدرجوه باش يتعاطى المخدرات، و حبس القراية لأنه عاود شحال من مرة في نفس القسم، حنا كامل في البيت سمعنا بتعاطيه، و تكلمنا معاه و نصحناه و توقف يامات، والدتي سجلاته في شركة باش يدير تكوين قرى شهور و توقف، و رجع للتعاطي ،حتى مرة تعاطى جرعة زائدة و دخل في غيبوبة ، جرات بيه والدتي للمستشفى و عالجوه، و نصحوها تاخذه لمصلحة مكافحة الإدمان في بليدة، دخل للمصلحة تقريبا شهر و أعطاوله أدوية و متابعة عند طبيب نفساني، و والدتي حاولت بكل جهدها أنها توفرله كل واش يحب من لباس و أكل ،واش يطلب تشريله تحرم من نفسها و تمدله و تقولي ممكن ربي يهديه،حتى خاوتي من الخارج و يبعثوله واش يحب ، و هذا العام زادت سجلاته في مركز التكوين المهني و هذا الأسبوع قرر باش يحبس القراية، قالنا كرهت و بزاف عام ونص، و عاود رجع للإدمان دياله بكثرة حتى شرب الخمر أعزكم الله، و صار يهددها يبيع مقتنيات البيت إذا ما مدتلوش المال و رفد يده عليها شحال من مرة، و البارح قررت أنها تبعثه لأداء الخدمة الوطنية و جرات عليه و قالولها أبعثيه يدير الفحص ،(هو راه متأخر لأنه الدفعة دياله راهي فاتت)، قالتلي باش نتهنى منه و يذوق المزيرية لأنه ما حبش يحمد ربي على الخير ألي راه فيه.

راح تقولولي الوالد وين راه من كل هذا؟؟والدي سامح في البيت و متخاصم مع الوالدة، ياكل و يرقد برك، هي ألي تصرف عليه وعلى الدار، وهذا الشيء زاد أثر في أخي.

هل القرار ألي توصلت ليه والدتي هو الحل لمشكلة أخي؟مرات تقولي نشتكي بيه للأمن و لكن تتراجع و تقول راح تسوء السمعة دياله.