خبز الشعير (الحامضة) من يدين الوالدة الغالية

[raboha]

البسملة1

اليوم جبتلم خبز الشعير هاكا نتوما تسموه بصح حنا نقولولو الحامضة
كاين اللي يزيدلها القارص و لا يخلي خميرتها طول باش تجي قارصة
حنا نحبوها عادي و نربو خميرتها ليلة فقط و هي تخلطي كمية سميد الشعير بالملح و الماء و تخليه يبات و غدوة من ذاك تخلطيه بكمية كبيرة حسب عدد الأفراد و تخليها ترتاح مدة ساعة
ثم تنحي كمية من العجين و تعركيها بيدك و شوية ماء الماء ملزمش تكثري بلي يدك برك ثم لميها شكل كرة و نحي منها شوية و بداي تسوي فيها مليح إخدمي الأطراف مليح و بداي كل متخبزي تقلبي و بلي يدك حتى تأخذ شكل دائرة حاكمة روحا حطيها بجهة حتى تكملي كل الخبز
تقدري تخبزي حتى 6 خبزات و تحطيهم فوق بعضاهم من بعد تبداي طيبي بالوحدة
سخني الطاجين ثم لوحي الخبزة و كي تنشف شوية برك راها تبان فالأطراف إقلبيها
و كان تخليها طول تتشقق قاع فالأطراف
بعد ما تقلبيها خليها تنشف شوية و حطي عليها مهراز و لا طاس معمر ماء المهم حاجة ثقيلة
باش تتحمر مليح حنا نحبوها مورفة يعني حمرة بزاف
و اللي يحبها طرية متحطيش عليها الحاجة الثقيلة
إن شاء الله فهمتو الطريقة و الباقي على الصور و كاش سؤال راني هنا



















هذي هي الحامضة تاعنا و ناكلوها باللبن و لا الحريرة اللي هي حريرة المرمز
و فالأخير منكم دعوة خير للوالدة الغالية
و ربي يحفظلكم كل أمهاتكم يا رب
أختكم أم لميس و لجين