*** بريوش على السريع ***

[ام حمزة22]

السلام عليكم ورحمة الله تعالى وبركاته

ان شاء الله نكونوا كااااامل بالف خير

اخواتي الكريمات امس كانت عندي النت شوية خفيفي من فرحتي قعدت اتصافح مواضيع في المنتدى حتى نسيت روحي والوقت فاتني
وككل يوم جمعة متعودة نزور اهلي فالمساء وكان لازم عليا ندير حلو نديه في يدي وكان زوجي جابلي الفرينة وقالي هادي للبريوش
بعد ما فطنت وحسيت الوقت جاز على السريع حضرت البريوش وجا روووووووووعة خفيف وبنين

سبقت فالبيض خرجتو من التلاجة وحطيتو في ماء دافي باش ما يعجزليش الخميرة

في اناء حطيت ملعقة اكل ونصف خميرة الخبز + كاس سكر + مبشور 2حبات قارص + كاس زيت نقست منو الربع احتفضت بيه باش نضيفو اخر الوصفة

ضفت للخليط 4 بيض وكنت درت لحليب على النار باش يدفالي لقيتو سخن بزيادة وعلى السريع بعد ما ضفت البيض ضفت 2 كسان حليب مع الخفق باش ما يطيبليش البيض
ثم ضفت الفرينة وخليت العجينة لزجة ما يبستهاش بزاف
وباش نسلك يدي من العجين ونطم العجينة الربع زيت لي نقستو خديت نصفه وضفتو للعجين
دفيت الفرن وحطيت فيه العجين باش تخمر بعد نصف ساعة لقيتها ضاعف الحجم نتاعها
وبنصف الربع زيت لي قعد ضفتو للعجين بعد ما خمر
دهنت السنية بالزيت وكونت كويرات صغار ودهنتهم بخليط من البيض وقليل من سائل القهوة ورشيتهم بالسكر
وان شاء الله يعجبكم بريوشي لي حضرتو ع السريع

مع تحياتي الحارة للجميع