الوسواس

[مشكلتي]

السلام عليكم
كنت فتاة ملتزمة متفوقة في قرايتي كنت من الأوائل في الليسي في سنة 2 ثانوي تخطبت معلاباليش علاه ولا كيفاه قبلت الحاجة الوحيدة الي كنت نعرفها أنو كان حلمي زوج صالح واسرة تنشأ على القرآن والدين المهم عقبت الباك وتزوجت وفرطت في دراستي الي تعبت فيها.
صدمت بالواقع المر في زواجي هذاك الزوج الصالح الي كنت متخيلاتو لقيت العكس حاولت نتأقلم مع هذاك الوضع مقدرتش. انسان كان يسب والديه يسب الدين بالرغم أنو كان ملتحي أشياء أخرى لا داعي لذكرها
المهم جا النهار خلاص قررت أني نتطلق وبالفعل تطلقت وجبت ابني عبد الرحمان الذي كان حلمي أن يصبح من حفظة كتاب الله
رجعت نقرا و أنا ذك راني سنة 2 شبه طبي بصح كل ما نتفكر صحاباتي الي كانو ينافسو فيا راهم يقراو طب نتحسر ونموت ألف مرة والله تعبت تعبت تعبت بمعنى الكلمة حاجة في نفسي تقلي "ايه هوما ولاو أطباء و انتي مجرد فرملية " أنا متأكدة أنو هذا نقص ايمان مني قولولي بربي واش ندير باش نقنع بالشي الي عطاني ربي
والعباد زادو عليا ديما نفس السؤال يقولولي علاه خيرتي تتزوجي وخليتي قرايتك وانت كنتي من الأوائل يا رب أنا منيش عارفة علاه صرى هكا ذك 3 سنوات على طلاقي والوسواس محبش يتنحالي حتى وليت مريضة من معدتي من كثر التخمام
جزاكم الله خير