الطب من جديد .. عاونوني بارك الله فيكم

[مشتاقة إلى الرحمان]

السلام عليكم و رحمة الله وبركاته
بسم الله

اخوتي اريد ان أشارككم همي علكم تكونون لي البلسم الشافي ، انا درت طب قريت 3 سنوات جبتهم لكن دايما كاين حاجة تقولي انو ماشي مجالي مانقدرش نبدع فيه اصلا مانيش حاسة روحي متحكمة في كمية المعلومات القليلة اللي نقراوها وينك يا نوصل للتطبيق و التوسع و الاتقان بلوكيت هذا العام و عاودت الباك على اساس نبدل الشعبة لكن كيف كيف مازال ضغط الأسرة و المجتمع ماقدرتش نتخلص منو و سببو التخلف اللي رانا عايشين فيه غياب الوعي بشكل كبير انا من وجهة نظري المجتمع تاعنا هذا الوقت يحتاج اللي يوعيه و يخرجو من دوامة المظاهر و السطحية اكثر ما يحتاج للي يداويه يحتاج للي يحيي روحو و نفسو و عقلو اكثر ما يحتاج للي يحيي جسدو انا كنت متأكدة اني قادرة على الابداع في مجالي لكن هاذ ال4 سنوات دمروني تماما نفسيا اصبحت شخص مدمرررررررر كرهت حياتي بمعنى الكلمة و ذرك راني حايرة بين ندير واش راني حابة و نواجه من اجل الفكرة اليي نؤمن بها او ندير رغبتهم و نندم طول حياتي و نتحاسب على نفسي و صحتي لي راهي تضيع .. المشكلة انو جيل ابائنا يقولك تندم كون جيب مليح و ما ديرش طب يقولك ربي يحاسبك عطالك قدرات باش دير طبيب و انت ضيعتهم في مجال اخر تافه راني حايرة كيفاه يخمو مافهمتش تعقدت تاع الصح و عييييييييييييييييييييييييييييييييييييت كون غير ماكنتش نقرا مليح راني في دوامة غير ربي لي عالم بيها نتمنى لي يشوف هذا الموضوع ما ينسانيش بدعوة في ظهر الغيب ربي يفرج علي لأني رح نطرطق و ربي يوفقكم كامل تتقنو و تبدعو واش تحبو لأنو عامل النظافة لي يتقن خدمتو يكون خدم البيئة و الانسان و الحيوان و ساهم في نقص الأمراض و بالتالي راكم شايفين المعادلة وهذا لا يعني اني نقول الطب ماشي مليح بل من المهن الراقية و نحترمو جدااا و نحترم الأطباء و يقراو معاي ناس ما شاء الله و كاين ناس انا نطلع عامي بمعدل اكثر منهم لكن نحترمهم اكثر ما نحترم نفسي في الطب لأني مدركة بلي النقطة ماشي مقياس المقياس هو حب المجال و الابداع فيه و مدى التحكم فيه ..انا ماكرهتش الطب لانو صعيب او مالمظاهر اللي رانا نشوفوهم او او او انا لا ارى و لا اجد نفسي في هذا المجال و مانيش حابة نضيع حياتي في حاجة مانحبهاش حابة نبدع فالمجال لي نلقى روحي فيه لأني حقا ضعت و كرهتتتتتتتت و راني حاسة بلي فقدت الأمل في كل شيء لأنو كان ضغط كبيررررررررر اني نقرا حاجة و مبعد نخدمها وانا مانيش مقتنعة ماكانش توافق بين وش راني ندير و واش راني مقتنعة ماشي ضغط الدراسة لي كرهني لأني يعني ماكنتش مضغوطة فالقراية لدرجة اني نهرب من هذا المجال المهم ان شاء الله تفهموني علابالي هدرتي راهي مخلطة على خاطر راني مقلقة بزاف مازلت ما أكدتش التسجيلات و مازلت مترددة تلفوهالي كاممممممل لي عندو نصيحة او تشجيع او اي كلمة طيبة مايبخلش بيها علي و لي رايح يقولي الطب مليح علابالي بلي مليح انا لي مانلقاش روحي فيه ... المهم ربي يوريلنا الحق و يعينا باش نتبعوه و بارك الله فيكم