طاجين حلو دون لحم

[نور اليقين 66]

السلام عليكم ونتمنى تعجبكم وصفتي لطاجين الحلو اللي معتمدتها وعرفتها كي كنت نقرا في الجامعة وكان رمضان يجينا ثمة كنا نتجمعو في 8 بنات نفطرو مع بعض ونتعاونو في كلش وفي مرة جات واحدة لعندنا تفطر معانا وجابت معاها حوايج باه تدير هذا الطاجين من دارهم انا شفتها وحكمت عليها الوصفة لكن لا اتذكر من اي جهة لانو جهتنا منديروهش كامل انا دخلتو للدار هههههه وكي لقيت كامل الوصفات يحكو على اللحم قلت لازم نحط الوصفة هاذي
اسمحولي طولت عليكم

انحكي الوصفة والمقادير معاها

نجيب كلغ تفاح نقشرو ونحيلو الوسط ونقطعو دوائر وكل منكمل حبة نلوح عليها السكر باه متكحالش السكر اكثر من 1 كلغ تقريبا كيلو ونص

كي نكمل نجيب طنجرة كبيرة اللي رايحة نطيب فيها نحط التفاح والسكر ونزيد عليه حوالي لترين ماء او اقل قيس متحسي التفاح تغطي وتضيفي 2 ورقات رند ومغرفة صغيرة فلفل اكحل ومغرفة صغيرة كركم وتشرحي ليمونة صغيرة وعود قرفة و3 هكذاك اعواد قرنفل وملعقة كبيرة زبدة ستار وتخليهم يغلو على نار هادية

من جهة اخرى تحكمي العين المجفف والزبيب والبرقوق تكوني قطعتيه وتديرهم يفورو

كي تشوفي التفاح لونو تبدل واذبال معناها راه طاب
المغرفة اللي تكوني تحركي بيها شوفيها ثان باه اذا حبيتي العسل يكون خاثر اكثر يتسمى تزيدي تغليها اكثر

تجيبي الزبيب والعين والبرقوق تلوحيهم في الطنجرة وتزيدهم 5 دقايق لا اكثر وخلاص هاي طابت بالصحة والراحة

هاذ الوصفة بنينة و الحاجة الاخرى متترماش انا درت كمية مهولة هههههههههههههههههههه عارفة بصح ضرك نحط في الكونجيلاتور ونجبد طوال الشهر تكفيني

وهاذي صورتها

مانيش مصورة بزاف خطوات وان شا الله تعجبكم وتجربوها وتدعولي وتدعو لصاحبة الوصفة