دورة فراشات تزهو بالألوان بيوتهن قمة في النظافة و التنظيم و التدبير و الاتقان

[ام مؤمن]

lotus flowerl راني جيتك يا العزيزة و الله ماتزعفي علينا راكي ختنا

كل ما كتبتيه رائع راكي ماشية مليح و منظمة حياتك و متهلية في زوجك و اولادك اسلوبك في الاعمال اليومية منظم و واضح
تكلمتي على مشكل الغبار و الرمل هنا ننصحك انت تهوي البيت في الصباح الباكر و تغلقي النوافد و الشبابيك تجنبا للهواء و راكي قلتي تستعملي مكيف ممكن يساعدك كي تكون السخانة و لكن حاولي دائما ماتحليش الطواقي كثيرا

بالنسبة لتحقيق الاهداف رانا في ركب واحد تقريبا انا اعاني من عدم الانظباط ايضا في قراءة المصحف و ناقصني الالتزام لكنني اعمل جاهدة على تنظيم وقتي و تحديد وقت محدد التزم به ما استطعت و لما لا التزم نلوم روحي و نعاود نبدا من جديد
حتى يصير الالتزام عادة نكتسبها مع الوقت
صلاة الفجر انا عندي نفس مشكلتك نسهر و مانقدرش انوض و اليوم اللي مانصليش نبقى قلقانة و نوض من فراشي مكرزة و حتى اذا صليت الاوقات الاخرى في وقتها نحس حاجة ناقصة انا مشكلتي الغسل نعجز باش نغتسل على 4 صباحا و راني نحاول نغلب نفسي
بالنسبة لقلة النوم اكتشفت ان نهوضي للفجر لايؤثر على نومي كلها ربع ساعة و نرجع ننام الشيطان برك يوسوسلي بلي مانشبعش رقاد و هاذو ايامات و انا نصلي و نقرا الاذكار و نرجع نرقد و نوض على السابعة و الله فرحت بزاف بصلاة الفجر في وقتها ربي يدومنا عليها
بناتك راكي قايمة بيهم ربي يرزقك الولد ان شاء الله و ربي يقدرنا على وليداتنا حتى يكبروا
انا عندي مشكل نحب نعمل اشياء كثيرة في نفس الوقت مثلك لكنني تعلمت ندير تخطيط و نكتب الاولويات في جدول بالترتيب و نقسم وقتي لكل حاجة شوية و حاجات ناجلهم حتى يفرج ربي و ساعات ننتكس و يجيني احباط ماندير والوا و نقلق بزاف حتى نبكي و بمجرد تنتهي القلقة و نبكي نستمد قوتي من ضعفي و نعاود نرجع من جديد منين بديت و نتحدى كل شيىء و هذه هي الحياة يوم نطيح يوم نوض
موعد النوم لازم تحسميه بقوة و تحاولي تلتزمي بيه و تحداي نفسك و راح تنجحي في التحدي
العزومات زوجك يعرف اصحابوا و واش يحبوا ماكلة سقسيه و اللي ماحبش اطباق تقليدية ديريلوا اطباق عصرية من المنتدى و حاولي ديري موني في ورقة و سجلي كل مرة واش يخرج عليك
نتمنى نكون افدتك و لو بقليل و راني هنا نسمع لاختي كاش ماتحبي تفضفضي احكيلي و فرغي قلبك
راني كتبت جريدة ماعليش الاخوات اذا حبوا مايعييوش ارواحهم المهم انت تقراي و ترتاحي
حبيبتي رانا في سفينة وحدة كلنا لست وحدك من تعاني من مشاكل و لازمنا نتعلموا الصبر و الحكمة و المثابرة عسى الله يوفقنا لما يحبه و يرضاه