صابلي الشامية الرااائع،،،قرمشة و طعما

[om assem et loudjain]

السلام عليكم ورحمة الله وبركاته

مساء الورد و الجوري لكل عضوة

صابلي الشامية او حلوة الترك كما يسميها البعض من الحلويات الي ما نستغنآش عليها في كل مناسبة وحتى دون مناسبة
ذوقو يهبل وفيه قرمشة جميلة وجد محببة ، جبت الوصفة من عند سلفتي ( يعني اخت زوجي ) وكل مرة نضيف تحريف صغير
حتى نهار درتو وديتولهم ما عرفاتوش بلي هو وطلبت مني الوصفة
اروع ما فيه انو باهي و ساهل و يطيح بزاف ، اذا رققتي الحلان يديرلك اكثر من ميا وعشرين حبة

المقادير:

500 غ مرغرين ، استعملت لابال
اربع بيضات كاملين
1/3 من علبة زبدة ستار يعني حوالي 65غ
1/2 كاس زيت
زوج كيسان سكر رطب
زوج كيسان نشاء يعني مايزينة
1/2علبة شامية من الصغار
فانيلا
زوج ساشيات خميرة كيميائية
حوالي كيلو فرينة

الطريقة

تخلطي كل المقادير و تنشفي بالفرينة وتلميها دون عجن

تحليها بالحلال مفرشتلها و مغطيتها بالساشي باش تجيك خدمة رطبة و باهية
تطبعيها و طيبيها وكي تخرجيها وهي سخونة تغطي نصف كل حبة و تذري سكر رطب على النصف الاخر

وصلنا للمفيد

سر بنة هاذ القاطو يكمن في الحشو الي تلصقي بيه
ديري كاس كاوكاو مقلي مليح و مرحي رقيق مع رطل معجون مشمش و عصير حبتين قارص و علبة صغيرة شامية
تلصقي كل زوج حبات بيه مع مراعاة تجنب الوسط تخليه فارغ باش من بعد تعمريه بالمعجون فيه شوية ملون احمر
الخطوة الاخيرة
تذوبي علبة شوكولا وتعمريها في جيب حلواني من النوع الصغير و تثق بيه بلابرة فقط باش يجيك الرسم رقيق و متحوف و ترسمي زخرفة على النصف لي ما فيهش السكر

إليكم الصور حبيباتي و سامحوني على الإطالة









دعواتكم لبنتي بالشفاء و لي بالقدرة على العناية بها على اكمل وجه
تم بعون الله
سبحانك اللهم و بحمدك أستغفرك وأتوب إليك