ارواحو تسمعو ... عيش تسمع عيش تشوف{وين راكي يا بن غبريط}

[ميمي سمية]

ســـلام عليكم

فتحت هذا الموضوع باه نبرد قلبي شوي ونخليكم تشوفو وش رانا عايشين

خليوني نسقسيكم ,,,,, ماشي زعمة السيدي لي حكات عليه بن غبريط حق كل واحد منا؟؟ ماشي قالت لازم كل تلميذ يكون عندو السيدي؟؟

ارواحو تشوفو الليسي تاعنا ,,, زعمة قال قال ليسي محترم ومزير ويمشي بالقوانين قدقد

مدو لولاد معارفهم واحد واحد ,,كاتبينهم في الورقة ،،كل واحد مادي واحد

كي وصلت دالتنا .. قالك لازم يكونو 4 باه نمدلكم وااااااحد بيناتكم

واحد بين 4؟؟؟ تمسخر بينا نتا؟؟ شكون راح يقرى وشكون راح يقعد؟؟؟ قلتو رانا مانتلاقاوش طوول مانعرفش اصلا الباقي وين راهم عايشين ولا وين يسكنو ,,, مدنا واحد بين زوج ــــ انا وصحبتي ونقرافيو نورمال {بحكم اني نتلاقاها}


السي خونا المحترم قالي مكانش روحي زيدي جيبي زوج وارواحي ,,, قتلو سي بون خرجت انا وصحبتي دبرت زوج اسماء تاع زوج بنات اخرين وقتلها نعاود نوليلو حتى انا ،،،،، رجعنا زعمة بعد ماراح نجيبو واحد بين 4بنات

عاااودنا درنا لاشان ،،وحنا نستناو في دالتنا ,,, جات المراقبة العامة تاعنا ومعاها ام تلميذة

حرقو لاشان كي والو وهزت المراقبة سيدي غلفاتو للولية ومدتهولها ,, اااا وي حنا تمدونا سيدي بين 4 عباد ،، وسي لالة تجي من هيه تدي لبنيتها الحنونة لعزيزة سيدي تقرى بيه ،، علاه هي عبد وحنا لالا؟؟ هي عندها باك وحنا لالا؟؟

روح معليش عفسنا على قلبنا وسكتنا كامل قدام هذاك المشهد القاتل ،،،،، وصلت دالت وحدة قبلنا قالنا صايي خلصو سيديات ،،، البقية يرُوحو يرْوْحو
ااااا مليحة هذي من الصباح وانا نستنى ومن بعدا تقولي روحي تروحي

خليتو فرا حكايتو مع لي قبلنا وشاف معانا قالنا قتلكم خلصو ,,, قتلو مي شوف يا استاذ من االصباح وحنا نستناو ،، قلتنا روحو زيدو جيبو زوج رحنا وزدنا دبرنا زوج بنات وعاودنا لاشان من اللخر كي نوصل هنا تقولي خلصو ،، وديجا راك تشوف خرين مكتوبين اسمائهم زوج مرات وحنا مانديوش طول؟؟ قالي الغلطة تاع المراقبين لخرين لي ماعدلوش لاليست والتالي كان جيت انا ندير كل قسم وحدو

قتلو مي راهي تطفر فينا حنا ماشي نتوما قالي وانا وش راح نديرلكم قتلو اوك سي بون يكثر خيركم ا شيخ وجيت خارجة
عيط قالي او استناو استناو راهم يقرافيولكم

ياسبحان الله ياسبحان الله شوفو ،،، قبيل كان يقولنا راه بقى غير واحد روحو تروحو ،،، وذك كي بينتلو تاع بلا زمزيتكم يقولك استناو استناو راهم يقرافيولكم

وين رانا عايشين؟؟ راكم شايفين؟؟ تنيفيق هذا ولا لالا؟؟ صوارد الدولة وهوما يتمشتقو فيهم ،، حقنا وياكلو فيه كي والو

من بعدها لقيت زوج صحاباتي راحو من بعدنا ،، تلاقاو مع نفس المراقب قالولو جينا على جال السيديات قالهم خلصو مدونا 100 واحد برك وزعناهم كامل كل قسم حطينا فيه 4 ،،،، الله أكبر

ماعندوش بزاف من اللي كان يقولنا استناو استناو راهم يقرافيولكم

مالا يا بن غبريط وزعتي 100 سيدي برك؟؟ ,,,, اجري تسمعي وش يتقال عليك


ياحفيظ يا ستار واللي قتلني كثر :: الليسي لي قدامنا وين تقرى ختي راحو ودارولهم السيديات

بالفايض وكل واحد مدولو السيدي تاعو ودخلوهم لقاعة الاعلام الي جربوهم كامل وتاكدو بلي راهم يمشيو وقالهم المدير المدرسة راهي مفتوحة ليكم لي

معندوش ميكرو في الدار يجي هنا ندخلو للمكتب تاع الاستشارية ويقعد لبغى لثمة من الصباح لليل ،،، ولي بغى يطبع الحوايج لي فيه يجي عندنا هنا

نطبعولو الدروس لي باغيهم ،، وقالهم الليسي راهو مفتوح في السمانة الاولى تاع العطلة اذا بغيتو جيبو الــ pc تاعكم وتلمو هنا واقراو مع بعضاكم ,,,,


نحمد ربي اني عندي ذك ختي تقرى في هذا الليسي وجابت السيدي تاعها ،،، والتالي كون ماراحش نشوفو اصلا ونقعد نحلم بيه ,,, شوفي يا بن غبريط واسمعي ،، قال قال بغيتينا نتقدمو حتى حنا ونمشيو مع التكنولوجيا ،،، مي ماشي مع عباد كي هذوا

قولولي ذك وش تعليقكم؟؟؟