دورة فراشات تزهو بالألوان بيوتهن قمة في النظافة و التنظيم و التدبير و الاتقان

[حبيييبة]

المشاركة الأصلية كتبت بواسطة ~ حراير ~

السلام عليكم و رحمة الله تعالى و بركاته

اولا نصيحتي لمن "ماتحكمش روحها قدام الميكرو" كي حالتي احيانا
طفيه و هني راسك

اولا حبيبة قوليل 15 دقيقة لمكان واحد او كل مكان 15 دقيقة يعني انا درك خممت في 4 بلايص يعني ساعة يوميا؟؟؟؟؟

و المدة شحال اسبوع و الا حتى وين نكمل لبلاصة و نبردها؟؟؟؟؟؟؟؟هيهيهيهيهيه

ربي يبردها علينا نهار غدوة و نلقاو الحبيب عليه الصلاة و السلام عند الحوض يسقينا شربة ماء لا نضما بعدا ابدا
قالك الي يذكر يوميا الجنة و يدعي يوميا انه يدخل للجنة
ربي يستجابلو و يدخلو للجنة

بالنسبة لبرنامجيحبيبتي حبيبة الناس كلهم يعرفوه
لكن ماعليهش نعاودو لعيونك

قبل نقلك انه السكن الوظيفي الي ساكنة فيه كبير و يعيي بزاف عدي صالون و صالون امونجي لكن انا درتو غفرفة جلوس و كوزينة و هول و 2 غرف و دوش تحسبيه حمام من وسعو و سيشوار و بالكون وااااااااااااااااسع كل يوم نسيقو لانه احنا عندنا الغبار بزاف
ربي يبارك ماشاء الله لا قوة الا بالله
لكن الحقيقة متعبتني الدار و كبرها و كبر مساحة غرفها

اولا برنامجي يبدا من الليل
تنظيف كوزينة و دوش و مرحاض
و نفوتو البالي على غرفة الجلوس و الصالون و نفوت ممسحة خفيييييييفة على وجه البيبيوتاك او ليفينغ

الصباح نوض بكري 5 كاقصى حد بعد الصلاة نفطر وحدي مع الميكرو بكري و درك نفطر وحدي و من بعد نلهى بروحي نوض الجماعة و نروح للكوزينة ندوزن زوج برم بلا ما نشعل عليهم النار

نفطر لبنيات و نتحكاو و يروحو للدراسة نفتح النوافذ نشعل على البرم و نغسل مواعن لفطور و نجوز نشاف على الدار
و من بعد الاعمال لخرى طي كي غسل ملابس

نقلك برك بلي غرفة لنات اختصاصهم اليومي يعني فراش و كيما نقولو "منين يشوف احمد" يعني يرجعو ادواتهم يعلقو ملابس النوم و هكذا

هاد البرنامج تبعتو منين بناتي صغار و قالك اذا غلبوك بالكثرة اغلبوهم بالبكرة


راني اختصرت زعم
درك نقلك على عادات مليحة فيا الويكاند للعائلة ماندير والو فيه اشغال
على هك عندي الاحد نهز لفراش و نسيق و نصب الماء مش جوز النشاف

العادة الثانية الصباح نطيب لغدا مع لعشا لعشية نفوتها مع لبنات و دراستهم
التعشيوة مش كل يوم نطيب على هك اسبوعيا ندير قاطو و حاجة معسلة بسبوسة او قلب اللوز
اما الهاي كلاس باتيسري او رولي او طارطولات فمرة شهريا فقط

البيتزات و مشتقاتها نطيبها للغدا منين لبنات يقراو باش ما نعطلش روحي عليهم ايضا انواع الكسرة و لو انه تقريبا يوميا نطيبهم

يعني بالمختصر ساعات 9 راني قاعدة و فم نبدا للعميق او اعمال اخرى

صحا فطوركم فراشاتي
حبيت ندخل نجاوب على استفسارك حبيبتي حرة الحراير
15د في اليوم فقط
نعطيك مثال
راه عندك بلاكار المطبخ فيه الفوضى
و عندك درج التسريحة راه فيه الفوضى
و درج البيبليوتيك تاني فيه الفوضى
واش رايح اديري
اليوم حددي 15د بالمنبه تاع البورطابل او حطي الساعة امامك
و ابداي تشتاغلي على بلاكار المطبخ
كي تكمل 15د توقفي
و روحي كملي حياتك اليومية

غدا لما يجي وقت تنظيف الفوضى اللي حددتيه لنفسك صباحا او مساءا او اي وقت يساعدك
تاني حددي المنبه و ابداي تشتاغلي على البلاكار لمدة 15د
كي تكمل تاني توقفي و كملي يومك عادي و شغالك المعتادة

هكذا حتى تكملي مع البلاكار

و اليوم الموالي ابداي مع النقطة الساخنة اللي بعدها يعني درج التسريحة مثلا


فالعشية ان شاء الله رايحة نعلق على برنامج تنظيفك الرائع فراشتي
و رايح نعلمكم كيفاه تنظموا اسبوعكم
و تنظموا اشغالكم فيه
غير تبعوا معايا بالعقل
و بالشويا بالشويا
و مع شوية صبر رايح تتنظم يومياتكم و اسبوعكم و حتى شهركم يتنظم لما نتعلموا معا بعض
كيف نستعمل الكالندر الشهري

حبيباتي ادعولي بالتوفيق