كيف تقتصدين في حياتكي اليومية.موضوع متجدد

[زينب 83]

السلام عليكم
عجبني الموضوع صراحة و انا من محبي الاقتصاد خاصة بعد سياسة التقشف لي دخلنا فيها راح نحاول كل مرة نحط البعض من أفكاري و نأخذ و أستفيد اكيد من افكاركم لكن حبيت نبدأ بأفكار اخروية باه ربي يباركلنا في الدنيوية

اولا انا كل شهر ندي انا و زوجي مبلغ من المال ونشرو الرافيطايمة تاع الشهر كلشي ماتشربش غير اللحم والخضر

كل شهر كي نشروها نحي حاجة و الزوج و لا اكثر حسب واش شريت ، مشلا ساشي سكر ، او علبة طماطم ، قرعة إيزيس،،،،،،،،، ونخبيهم بعد أشهر كي تولي قفة مليحة وتقريبا دايما طيحلي مع المناسبات ، تمد هاذيك القفة لعائلة محتاجة ، و هكذا نفرحو الناس باسهل الطرق

ثانيا في ايام الاسبوع اكيد كل يوم يبقالنا شوي صرف تحت 100دج كل يوم يمدلي زوجي هاذاك الصرف و حتى ابني الصغير ولا يمدلي مصروفو ماشي حاجة كبيرة مرة 20 دج مرة 30دج نطمهم و في اخر الاسبوع نشريهم فواكه و نمدها لابني يروح مع باباه يزور مريض مانعرفوش ، او يديهم لجداه صلة رحم ، او يشريهم كعك و يديه لاصدقاءه في المدرسة او يشريهم هدية لاخوه و هكذا نعلمو اولادنا الاقتصاد و نحيو منهم صفة الأنانية و نرسخو فيهم قيم ممكن هوما يعلموها لاولادهم في المستقبل

ثالثا كل شهر نحي لزوجي مبلغ صغير بين 1000 و 2000دج و نخليه في ضرف كي يكبر هذاك المبلغ نعاونو بيه مريض على العلاج او عريس محتاج او عائلة في عيد او دخول مدرسي

هذي الأفكار خاصة بالعائلات المتوسطة لي مايقدروش يتصدقو بمبلغ كبير دفعة وحدة

هذه الأفكار علمهالي زوجي ، وراني كتبتها هنا فقط للإفادة ، لا لطلب سمعة او رياء و الله عليم

حباباتي اذا أزعجتكم بردي قولولي و سأحذفه على الفور