يابنات ماديروش لمان

[ام محمد امير]

هذي القصة شوكاتني تاع الصح خاصة لبنات لمزال مازوجوش ودايرين كونفيوص فالشباب، الاخت تاعي دايرة وحدة تخدم عندها تحكملها بنها كتروح تخدم، هي من اقارب زوجها وبحكم الطفلة هذي تسكن بعيد تبقى اسبوع عند اختى حتى لويكاند تروح، مالا اختي لاحظت بالي عندها اتصالات بزاف فالهاتف نصحتها اختي قاتلها ليحب يبني دار ماهيش بهذي الطريقة، قاتلها الطفلة هذا راه ناويني للخير وقريب يجيب الاهل تاعو وبحكم يسكن بعيد يطول باش يجيني ،فاتو ايام وجا خطبها هو والام كما قال هو طفلة هي مالشرق وهذا الانسان مالغرب، زادت نصحتها اختي قاتلها ماتعرفي عليه والو غير عبر الهاتف كفاش تقبلي بيه قاتلها اهلي وافقو وهو انسان مليح ،ماطولوش بزاف ياربي شهر دارو كلش العرس مع لفيونساي ،ايا الطفلة مسكينة راحت ومعلبالهاش واش هو ماصيرها، بعد مراحت وراحو اهلها وروحو اكتشفت بالي زوجها رئيس عصابةمخدرات ولمرا لجابها ولبنات زوج قال خواتاتي هما مالعصابة تاوعو ،ضربوها وسرقولها ذهبها وسرقولها حوايجها وطيشوها على شط لبحر، واحد فيه رحمت ربي شافها هكذاك داها للشرطة من ثم دارو اجرائات وعيطو للاهل تاعها جاو ليها وهذاك الراجل بحثو عليه مكانش كلش مزور اسمو ولقبو ماكاش خلاص في هذيك الولاية ،الطفلة جاها انهيار عصبي ودمرت حياتها وهذا كلشي ليدير لمان يا فتياة حلو عينيكم رانا في زمان غدار.